YiNtatheli kaMthunywa
UMCABANGO wokwakhiwa kwenkundla yomncintiswano weMotorsport ulokhe ukhona kubaphathi bezemidlalo.
Iphephandaba likazulu lithole udletshana lokuthi idolobho leVictoria Falls lizakuba lesakhiwo sakulezinsuku esenkundla yemidlalo ezasetshenziswa kumincintiswano yezimota ebizwa ngokuthi yi-grand prix, kutsho uHulumende.
Iphephandaba likazulu lizwe lokhu ngesikhathi umphathintambo wezokuthekelelwa kuleli uNqobizitha Mangaliso Ndlovu egcizelela ukuba uHulumende ufuna ukuphakamisa idolobho leFolosi njengendlela engakaze ibonakale.
Kubikwa inkundla le ikhangelelwe ukuthi iqhube imjaho yezimota njengalokhu okwenziwa emazweni alempucuko.
Ukwakhiwa kwenkundla ye-motorsport le kuzakwengeza inani lemncintiswano yaphezulu eqhutshelwa eFolosi Omunye umdlalo osufake udumo idolobho leli owokugijima owe Econet Victoria Falls Marathon.
Ngomnyaka ka2017, inhlanganiso ephethe umdlalo wekhilikithi kuleli eyeZimbabwe Cricket yabika isifiso sayo sokuthi kube lenkundla yomdlalo wekhilikithi eFolosi. Isifo lesi asikagcwaliseki kodwa umphathintambo uNdlovu uthe kwamulekile ukuthi iFolosi ithole inkundla ezinje.
“Siyatshisekela ngokuphakamisa iVictoria Falls ibelidolobho elinikeza izethekeli zethu okunengi. Sifuna ukuphakamisa ukwethekelelwa kwezemidlalo ngoba sebekhona osomabhizimusi abafuna ukwakha lokubuyisa umdlalo we-motorsport eZimbabwe,” nguNdlovu lo ekhuluma eseFolosi ngeviki edluleyo.
Umdlalo we-motorsport awuladumo kuleli loba nje zikhona inkundla koBulawayo laseHarare.