uMthunywa
Nkosilathi Sibanda
KUKHANYA kuzadonsa isikhathi eside ukuthi amaqembu enguqu akuleli aphenduke enkundleni nanko inhlanganiso yeFifa isinqume ukuthi iZifa ayihlale imiswe ukusebenza.
Kumhlangano weFifa osanda kugqitshwa eRwanda, kuvote amalunga eFifa angu-199, avumelana ukuthi iZifa ihlale imisiwe.
Zifa
IZifa yamiswa ngomnyaka ka-2021 kulandela ukusolwa kokuba inhlanganiso yeSRC isingenele ekuqhutshweni kwenguqu. Ngokomthetho wayo, iFifa kayivumeli ukuthi ingatsha zikaHulumende lezinye ziphatheke kunhlelo zenguqu.
I-SRC yakhipha iqula lenkokheli zeZifa ezazikhokhelwa nguFelton Kamambo. Okwamanje kulequla elitsha elibizwa ngokuthi yiZifa Restruction Committe ekhokhelwa nguGift Banda.
Gift Banda.
Ukwengezwa kokumiswa kweZifa lokhu kutsho ukuba amaWarriors awasoke adlala kuloba yiwuphi umncintiswano kulumnyaka njalo.
Ubuhlungu balokhu buhlaba kakhulukazi abadlali abasakhulayo asebekubona ukuthi bazaguga bengakaze bathole ithuba lokudlalela iqembu lesizwe.
Kumbiko wayo, iFifa ithe izaqhubeka ngesinqumo sayo ngoba iZifa yehluleka ukulandela izixwayiso.
Umhlangano ofanayo uvotele ukuvalela phandle ilizwe le-Sri Lanka ngokwephula imithetho yeFifa kulandela ukuxokozela okwenziwa nguHulumende wakulelo.
Kusenjalo, inhlanganiso zabaphathi bezikolo kuleli zibika ngokukhathazeka ukuthi ukumiswa kweZifa kumincintiswano yamazwe kuzaphambanisa ikusasa labafundi abalethalenta kwezemidlalo.
Umkhokheli weZifa, uFelton Kamambo
Kungumbono wababalisi, abaqeqetshi bamaqembu ukuthi loba iZifa isanikezwe isikhathi sokuthi ilungisise udaba lwayo, kuzakuba labantwana abanengi abazalahlelwa ngamathuba.
“Kuyadanisa ukuthola ukuthi lokhe sibuyela emuva, sibulala ikusasa labantwabethu. Ungaze udlale ibhola, kufana lokuthi udlalisa kumbe uchitha isikhathi ngoba kawusoke uyendawo.
Sibeke ithemba ebadaleni bethu kuSRC layo iZifa ukuthi baxazulule ngaloludaba,” kubika uNdabezinhle Ndlovu umqeqetshi wabadlali abasakhulayo kumaqembu angaphansi kwamaligi eZifa koBulawayo ngesikhathi ekhuluma loMthunywa ngoLwesithathu.
