Uncategorized

Kume umngcwabo sokukhala izibhakela

06 Aug, 2020 - 14:08 0 Views
Kume umngcwabo sokukhala izibhakela

uMthunywa

Intatheli kaMthunywa
ZISELE zibambe owangaphansi izakhamizi zeZamanyoni kuWadi 12 esigabeni seKezi ebezihambele umngcwabo wakoNdimande sokukhala isibhakela kubangwa ukuthi ngubani olamadlozi, uMthunywa uyakuveza lokhu lamhlanje.

Isehlakalo lesi okulokhu kunathiswana ngaso itiye senzakale ngoLwesibili kuyonale iviki kubekwa uNjengu Ndimande, okubikwa ukuthi ubethwasa eGoli kodwa ngokuswelakala kwenhlanhla wasedlula emhlabeni.

UMthunywa uzwe ukuba ngesikhathi sokumele kwenziwe isevisi yomngcwabo kwaqala ukungazwisisani phakathi kwezelamani ezimbili okwabangela ukuthi umngcwabo ume ntsi.

Ekhuluma lentatheli kaMthunywa uMnumzana Bongani Nleya ongumakhelwane owayekhona emngcwabeni uthe akalankani ngakubona koNdimande.

“Kwathi sokumele uNjengu ayebekwa endlini yakhe yokucina kwaqala umsindo kwaphoswa izibhakela kwaba luthuli. Abantu bonke ababekhona basebeme amadlodlongwane ukuthi kwenzakalani mpela abantu nxa bengasahloniphi isidumbu sebebanga amadlozi phambi kwabantu,” kuchaza uMnu Nleya.

“Imuli yakoNdimande iyisithembo njalo kukhanya okwabangela ukulwa yikuthi enye indlu yayisifuna amadlozi aye kweyabo indlu. Kukhanya vele emulini le ababambananga ngitsho.

“Khona okudidayo yikuthi kambe amadlozi ake abangwa na, angithi ayazikhetha umuntu afuna ukuhlala kuye,” kulandisa uMnu Nleya.

Isikhulumi samapholisa esabelweni seMatabeleland South ulnspector Philisani Ndebele ebuzwa ngodaba lolu uthe uzaluphenyisisa.

“Udaba olunjalo aluzange lufike ewofisini yami mhlawumbe luphelele emulini loba kusobhuku,” kuphetha ulnsp Ndebele.

Share This:

Sponsored Links