
Lovemore Dube
ABALANDELI beZPC Hwange bazathi ukubamba kancane nanko abadlali labaphathi beqembu balindele ngabomvu isimemezelo esiqakathekileyo esizacacisa ngekusasa yeqembu leli kuligi yeCastle Lager Premiership.
Isikhulumi seZesa, uGeorge Manyaya,uthe bazakhipha isimemezelo ngekusasa yeqembu.
IZPC Hwange yaba yintshantshu yeligi yeZifa Division One kumhlubulo ongezansi yelizwe ngo-2024, okutsho ukuba kumele idlale kuligi yeCastle Lager Premiership lonyaka.
Ukuncitshwa lelithuba kungaba buhlungu, ikakhulukazi ngemva kokulinda iminyaka engu-35 ukuthi iqembu lithathe lesi sicoco, lifinyelele iligi ephakemeyo, eyePSL. Kusukela Ngesizini ka-1989, iZPC Hwange ibilokhe izama ukukhuphukela kuPSL kodwa ikhethe ugatsha.
Nanko ke, ngaphansi komqeqetshi uMebelo Njekwa, bacine bephumelele ngesizini edlulyoe benqoba isicoco seZifa Southern Region Division One.
Kodwa iphupho lelo lisalengile okwamanje ngoba kusalindwe isimemezelo zeZesa.
Kumbiko wakhe, uManyaya uthe: “Nxa sekulungile, inkokheli zeqembu zizabeka isimemezelo esifaneleyo.”
Sekuqhamuke imibono etshiyeneyo, okuyikhona okungokuphazamisa ukukhutshulwa kweZPC Hwange.
Leliqembu elixhaswa yiZesa Holdings, selitshelwe ukuthi liveza abanikazi balo njengokuphawulwa yimithetho yeFifa Licensing.
Imithetho le iyawavimbela amakilabhu axhaswe yinhlanganiso kumbe inkampani eyodwa ukuthi aqhudelane kuligi inye.
Ikhomithi yezisebenzi zeHwange Power Station icele umgcinisihlalo weZesa Holdings, uSydney Gata, ukuthi angenele, baxazulule lolu daba.
Ikhomithi yabasebenzi iveze ukuthi ngemva kweminyaka engu-35 lisebenza kanzima, iqembu lifanele ukuthi lithole ithuba lokugijima kuPremiership.
UMehluli Thebe, unobhala jikelele weZPC Hwange, osebenze gadalala ukuze iqembu leli lingene kuPremiership, wenqabile ukukhuluma ngalesi simo.
“Mayelana lalokho, angilakho engingakuphawula,” kutsho uThebe.