uMthunywa
Bongani Ndlovu
ABALIMI sebekhuthazwe ukuthi bafuye imbuzi ngoba zingagcwala isibaya ngesikhathi esincane nxa ziphethwe kuhle.
Ekhuluma loMthunywa uMnumzana Petros Siziba ongumlimi esabelweni sakoBulawayo uveze ukuthi imbuzi ziyanda masinyane okuletha inzuzo kumlimi ozifuyileyo.
“Imbuzi zilakho ukuzalana zibe zinengi ngesikhathi esifitshane okwenza umlimi azitshayele imali. Imbuzi iyenelisa ukuzala amazinyane amane ngomnyaka nxa izala amawele kuthi-ke nxa izala elilodwa izala amathathu kuminyaka emibili.”
“Imbuzi zifuna ukufuywa lapho okulezihlahla ezimfitshane ikakhulu ezihlabayo ezifana logagu ngoba yikho ukudla ezikuthandayo kodwa lotshani ziyabudla,” kutsho uMnu Siziba.
Uqhubekele phambili wathi ukuze imbuzi zizale kuhle kumele zithole ukudla lamanzi eneleyo.
“Ukudla kuqakathekile kakhulu embuzini njalo nxa kungeneli umlimi kumele athenge okunye ukudla ukuze zingalambi njalo zizale kuhle. Imbuzi ingaswela ukudla ngesikhathi imithi iyaphunza kungakho kumele zithole ukudla okwaneleyo kanye lamanzi,” kutsho uMnu Siziba.
Uphinde wathi abalimi abafisa ukufuya imbuzi kumele bazifuye esibayeni esivulekileyo kodwa babone ukuthi bayasifulela ukuze zinganethwa lizulu.
“Imbuzi zifuna ukuhlala esibayeni esingenisa umoya kodwa kumele sifulelwe phezulu ukuze zinganethwa nxa izulu lisina njalo isibaya lesi akumelanga sihlale simanzi. Isibaya esilodaka senza imbuzi zihlaselwe ngumkhuhlane wamasondo,” kuchaza uMnu Siziba.
Uqhubeke wathi abalimi nxa belembuzi ezilamazinyane bazilandele ukuze babone ukuthi amazinyane ayamunya.
“Kuqakathekile ukuthi umlimi abone ukuthi amazinyane akhe ayamunya okwaneleyo. Lokhu kubalulekile ngoba ukumunya kwenza izinyane livikeleke emikhuhlaneni njalo likhule kuhle,” kuphetha uMnu Siziba.
