Ethel Ncube
LAMUHLA lilanga elibuhlungu kuqembu leNsimbi ZeZhwane lapho elalahlekelwa khona ngamalunga alo amabili kungozi yomgwaqo uElvis “Ma Eli” Mathe loThembinkosi “Maviri” Mpofu ngomnyaka ophelileyo duze leFatima kumgwaqo osuka koBulawayo usiya eVictoria Falls.
Kungozi efanayo uMeluleki “Brema” Moyo wephuka unyawo kukanti amanye amalunga eqembu asala lamanxeba ehlukeneyo.
Ekhuluma lentatheli umaneja weNsimbi zeZhwane uBahlanu Sibanda uveze ukuba lamuhla lilanga elibuhlungu kuqembu labo.
“Umhlaka 9 Ncwabakazi uzahlala esenhliziyweni zethu, lilanga elisithunuka amanxeba enhliziyweni zethu. Sikhumbula abafowethu abedlulayo. Nxa sivula omakhalekhukhwini bethu kunkundla zokuxhumana sithola amavidiyo abafowethu, abantu bebakhumbula.
“Siyehluleka ukudlulisa ubuhlungu esibuzwayo ngabafowethu sithi kabalale ngoxolo lapho abakhona.
“Ikatali izakhala isiyaphambili, sibakhumbula njalo sibahlonipha abanye bethu abasitshiyayo,” kubika uBahlanu.
Iqembu leNsimbi ZeZhwane likhiphe ama-singles amathathu lonyaka ngenyanga kaMabasa kukanti bakhangelele ukukhipha i-albhamu egcweleyo ngenyanga kaLwezi.
