uMthunywa
YiNtatheli kaMthunywa
ISIZWE sikaMthwakazi sizakuthi gwaqa kulimpelaviki kukhunjula inkosi uMzilikazi esigodlweni, eMatojeni, lapho okukhangelelwe ukuthi kube luthuli kugcwele abantwana benhlabathi.
Minyaka yonke, umkhosi lo, ubatshazwa umhlaba kukhunjulwa uMzilikazi kaMatshobana. Inhlanganiso yezamasiko iMthwakazi kaMzilikazi Cultural Association yiyo ekhokhela umkhosi lo.
Kubikwa ukuba kunxuswe wonke umuntu kulumkhosi ozaqhutshwa ngaphansi kwendikimba ethi ‘Siqoqa isizwe’. Isikhulumi esiphezulu mhla welanga nguPrince Isolengwe Tshawe.
Umqondisi wenhlelo kuMthwakazi kaMzilikazi Cultural Association uMnumzana Rodgers Vuthuza Mthethwa uthe kumele kucace emphakathini ukuthi umkhosi lo uyisikhumbuzo sikaMzilikazi hatshi okunye.
“Sesifikile isikhathi lapho esikhumbula khona inkosi uMzilikazi. Siyakhona eMhlahlandlela ngoMgqibelo silande ukukhumbula inkosi uMzilikazi njengeminyaka yonke njalo akukho okuzenziwa okutshiyene lokweminyakeni.
“Sihlonipha ukuba khona kwenkosi njalo sesikwenze okweminyaka elitshumi lasitshiya galolunye. Indikimba yalonyaka ithi siqoqa isizwe.
Injongo emqoka yomgubho lo yikukhumbula inkosi eyadabula isizwe uMzilikazi kaMatshobana njengeminyaka yonke,” kutsho uMnu Mthethwa.
Uqhubeke wathi bakhuthaza uzulu ukuthi aphatheke emkhosini lo ukuze azokhumbula inkosi yakhe.
“Sibiza wonke umuntu. Akula ozavalelwa phandle njalo sifuna ukwenza lokhu sikhululekile, singethuswa yilutho.”
Kubikwa kuzagidwa umculo wesintu, kube labahlabeleli bomdabu.
“Uzulu uzajabula sikhumbula inkosi mhla welanga. Sibika singesabi ukuthi inkampani yeNgwebu ikhona lotshwala besintu njalo kulabahlabeli abazakholisisa abantu. Sizakupha abantu abatshiyeneyo amathuba okuthi bakhulume.
“Kuzagidwa imihlobo yonke yemigido ngenhloso yokukhumbula impilo kanye lenhlalo yaboMandulo. Kuzakuba khona njalo amaqembu omculo kamaskandi, imbanqanga leminye ezajabulisa uzulu,” kutsho uMnu Mthethwa.
“Inhlanganiso yethu le sileminyaka engu-19 isenza umkhosi lo sivuselela ezamasiko kanye lokuwathuthukisa. Ngalokhu umkhosi lo siwenza minyaka yonke evikini yakuqala enyangeni kaMpandula njengoba inkosi yethu yakhothama ngayonale inyanga ngo1868.”
Inhlanganiso le iveze ukuthi kuzabe kulezimota ezithwala abantu eCity Hall koBulawayo ekuseni zibasa emkhosini lo zibuye ziphenduke labo.
“Sesikhulumisane labanikazi bamabhasi ukuthi beqoqe ukuthi bengathwala njani abantu kodwa izimota lezi ziyabhadalelwa akula eyamahala,” kutsho uMnu Mthethwa.
“Nxa bekhona abangancedisa, bavunyelwe ukuthi baze khuluma lathi, siqhube umkhosi wenkosi sindawonye.”
