Brandon Moyo
KULANDELA ukuphela kwemidlalo yeBulawayo Metropolitan Rugby Football Board (BMRFB) Archer Clothing Rugby League ngoMgqibelo odluleyo, ibhodi le isikhethe iqembu eliqinileyo okukhangelelwe ukuthi liqale ukuncintisa ngenyanga ezayo.
Iqembu lesabelo sakoBulawayo leli kuhlelwe ukuthi lidlala leqembu leZimbabwe A emdlalweni olindwe ngabomvu ozakuba mhlaka 14Mpandula enkundleni yeHartsfield Rugby Grounds.
Kukhethwe abadlali abangu-37 njalo kubikwa ngokuya kwesikhathi bazayehliswa, iqembu libe labadlali abangu-23, abazabhekana leZimbabwe A.
Umbiko ovele kuleliqembu uveza ukuthi kuzakuba lomdlalo phakathi kweMatabeleland Select le Development, mhlaka 7 Mpandula.
Umqeqetshi omkhulu weqembu lakoBulawayo uNelson Madida uthe basebenza gadalala ukuthi bakhweze izinga lomdlalo wabo.
UMadida uthe bafuna ukulolonga abadlali abazenelisa ukuthi bakhethwe njalo lakuqembu lelizwe, eliqeqetshwa nguPieter Benade.
“Sisakha kakutsha umdlalo we-rugby koBulawayo. Sifuna ukuhambisana lombono kamqeqetshi weqembu lesizwe, uPieter Benade, ebesihlezi sixhumana laye. Lokhu kuzanika abadlali bethu ithuba lokuthi bakhangelwe ngumqeqetshi lo,” kutsho uMadida.
Uqhubeke wathi ngaphandle kwabadlali abakhethiweyo, umdlalo ozayo leZimbabwe A uzaphathisa ukukhuthaza abasakhulayo ukuthi bathathele phezulu umdlalo we-rugby. Uthe ukholelwa ukuthi abadlali bakoBulawayo bazathola okunengi ngokudlala leqembu leZimbabwe A.
UMadida uthe basebenza gadalala ukwenza isiqiniseko sokuthi umdlalo we-rugby koBulawayo ubuyela kusimo sawo sakudala.
“Lolu uhlelo seluvele lwaba yimpumelelo ngoba luzaveza abadlali bethu abasakhulayo. Ukudlala leqembu eliphezulu, elimele ilizwe kuzabakhuthaza abadlali abasakhulay. Kumqoka kithi abaqeqetshi abasanda kukhethwa ukuthi sisungule inhlelo ezitshiyeneyo njalo eziqhubekela phambili ukuze umdlalo wethu koBulawayo ubuyele esimeni sawo. Akuwona umsebenzi olula,” kutsho uMadida.
Abanye abaqeqetshi abancedisa uMadida nguVictor Chiwara, Francis Nakamu loNtando Ndlovu.
Abadlali:
Babongile Ncube, Brian Dube, Tawanda Takawira, Exalted Tomu, Prayer Ngulube, Thabo Ndlovu, Keith Mhlanga, Garfield Macebo, Theo Goredema, Justin Khumalo, Kaitano Tembo, Mzwandile Maoche, Glen Maseko, Tadiwa Ngirazi, Kholwani Moyo, Lawrence Mutakiwa, Dyhandra Mackay, Paul Chade, Ziyanda Khupe, Hardlife Masunda, Vuyiswa Mpofu, Beglad Nekati, Biton Longwe, Blessed Ncube, Mandisa Masuku, Irvine Nduwa, Dino Mhlanga, Tanaka Chisuwo, Patrick Macklin, Jason Mackay, Mayibongwe Ncube, Naidel Ncube, Isheunesu Chinganga, Keith Nyathi, Daniel Nyathi, Sean Ncube, Innocent Ncube, Anthony Kalubi, Tanaka Ndiraire, Nqobani Lintini.
