uMthunywa
YiNtatheli kaMthunywa
INHLANGANISO ye-Bulawayo Basketball Association (BBA) isilenkokheli ezintsha eseziphiwe umlandu wokuthi zivuselele umdlalo lo olokhe usalela emuva eminye isabalala izwe lonke.
Ngeviki edluleyo amalunga alinhlanganiso akhethe uSinda Mono ukuthi abe nguMkhokheli wabo. UMono uthathele isikhundla uErnie Noble.
Ezinye inkokheli eziphiwe izihlalo kuloFrancis Dube ophindiselwe ukuba ngunobhala, uRueben Mumbire osengumgcinisikhwama, uXolani Botha osehofisini ebona ngezokuthengiselana lokwaziwa kwenhlanganiso, uTino Gumbo loTracy Phiri.
Umongameli we-Bab omutsha lo wake wabangumdlali wodumo ngeminyaka ka-1985 kusiya ku1995.
Izazi zendumela yomdlalo we-basketball koBulawayo zithe uMono yiyo inkokheli ezabuyisa intuthuko kulumdlalo.
Kusenjalo, inkokheli ezintsha ziphezulu kokulungisisa inkundla zeligi ukuze amaqembu akoNtuthu lawo eqhubeke ngomdlalo. I-basketball njengayo yonke imidlalo ibimisiwe ngenxa yokumemetheka kweCovid-19.
Ukumiswa kwezemidlalo kubhidlize zonke inhlelo zomdlalo we-basketball, lapho inkokheli zayo ebezikhangelele ukuthi ziqhubeke ngemidlalo ngemva kokudonsa inyanga ezilitshumi umdlalo ungavunyelwa.
Umongameli weBasketball Union of Zimbabwe uJoe Mujuru uthe bayakwamukela ukuthi okumqoka yokuvikela impilo zabantu kodwa lokhu sekuphazamise ikusasa yenengi labadlali.
