uMthunywa
Nkosilathi Sibanda
UPRINCE Dube usehlangane lobhudi omkhulu uBruce Kangwa kuqembu le-Azam elase-Tanzania, osemkhuthaze ukuthi angethuki lutho.
UDube ngoMvulo ufake isayinetsha yakhe evuma ukuba ngumdlali waleliqembu elisebenze nzima ukuthi limthole.
Umdlali lo usezadlala loKangwa ongomunye owake waba kuHighlanders kuminyaka edluleyo.
UKangwa wabangumdlali wakuqala weBosso ukuyadlala kuAzam njalo ubonakala njengomdlali owavulela abanye indlela yokuya kuleliqembu.
Ekhuluma ngokungena kukaPrince, uKangwa uthe umdlali lo angethuki kodwa afike azidlalele ibhola alaziyo.
“Ngimtshayela ihlombe uPrince ngokuba yingxenye yethu kuAzama. Kadlale ibhola lakhe elihle, engethuswa yilutho ngoba iqembu le-Azam liyalifuna ithalenta lakhe,” kutsho uKangwa etshela iphephandaba likazulu ngoLwesithathu.
UDube, odume ngelithi “Mgadafi” enkundleni ubizwe yi-Azam ngemali angange $US50 000.
Kusivumelwano lesi kukhangelelwe ukuthi iAzam incedise ukuvulela umdlali amathuba okuya kwele-Europe lapho okulamaqembu alemali ezwayo.
Lumdlali usuka kuBosso ngesikhathi elindwe ngamaqembu akwele-Europe njalo ubefunwa ngelinye ele-Siuth Africa. Ukumemetheka kobhubhane lwe-Covid-19 lokumiswa kwenguqu ngokunye okumenqabele ukuthi ahlale phansi.
