uMthunywa
Intatheli KaMthunywa
UMGCINISIHLALO weHighlanders uKenneth Mhlophe usetshele abadlali bakhe ukuthi bazibambe lokuthi kumele bahlanze lendawo abaphila kuzo ukuze benqabele igcikwane le-coronavirus.
UMhlophe usebike ukuba iqembu lakhe alisoze lilolonge okwensuku ezilandelayo ngendlela yokwenqabela ukumemetheka kwegcikwane eselimemetheke yonke indawo.
Kungumbono kaMhlophe ukuthi ukuvikela abadlali lomphakathi kumqoka ngalesi isikhathi umhlaba wonke uthwele nzima ukulwisana legcikwane le-Covid-19. UMhlophe, ngoLwesibili, uthumele iphephandaba likazulu inyathelo eselithethwe yiTshilamoya ukuze ivikele abadlali.
IBosso ibiphakathi kohlelo lokulolonga abadlali bayo loba nje inhlanganiso yePremier Soccer League imise imidlalo. Lokhu kuza njalo ngesikhathi uHulumende wakuleli ebike ukuba akusavunyelwa ukuthi kube lembuthano yabantu abanengi.
Kumbiko wakhe uMhlophe uthe: “Singalandela zonke izinqumo, sizayinqoba i-coronavirus ngoba nxa sisonke siyinqaba.
“Sithole isixwayiso esivela kudokotela wethu njalo salandela izixwayiso zikaHulumende ngokuqhamuka kwegcikwane leCovid-19. IHighlanders isimise inhlelo zayo zonke zokulolonga lindawonye. Bonke abadlali bacetshiswe ukuthi bengahlangani lomphakathi.”
Uthe isixwayiso esikhulu abasinika abadlali yikuthi bahlale behlanzekile.
“Sikhuthaza abadlali lezisebenzi zethu ukuthi ziziphathe, zenqabele ukuba yingxenye yembuthano ngalesi isikhathi,” kutsho uMhlophe.
Umgcinisihlalo lo, othe efika kuHighlanders iqembu laqala ukusukuma libonakala ngokuthwala inkezo ye-Chibuku Super, uthe bakhathazekile ngokuza kweCovid-19 kuleli.
“Iqembu likhathazekile ngokugcwala kwaleligcikwane umhlaba wonke, ikakhulu ngokufa kukaZororo Makamba. Sikhala lemuli yakoMakamba lelizwe lonke ngalesi isikhathi.”
IBosso ingelinye lamaqembu akunkundla enkulu kuligi yeCastle Lager asebophe isinqumo sokuma kancane ukulolongela isizini ka-2020. Imidlalo yakulisizini akwaziwa ukuthi izaqalisa nini nanko lenhlanganiso yePSL ime kancane ukuthi imidlalo iqale ngenxa yeCovid-19.
