uMthunywa
YiNtatheli kaMthunywa
UHLELO lokuhlanyela izihlahla ezedlula i700 000 kuzikolo zonke elizweni lusungulwe ngeviki edluleyo yinhlanganiso yeAfrica Grain Seeds ibambisane leGrow A Tree Foundation.
Okwamanje, loluhlelo selufike esabelweni seMatabeleland South eSigodini, esikolo seFalcon College lapho okuzahlanyelwa khona izihlahla ezingu- 75 losaba olwedlula 4 000.
Inhlanganiso lezi ziqale ngokunikeza usaba olungaba yi- 600 lezihlahla ezingu- 75 kusikolo seGwangwava Secondary School esigabeni seRushinga eMashonaland Central.
Ukuguquka komumo womkhathi kubangele ukuthi iAfrican Grain and Seeds le Grow A Tree Foundation ukuthi zibophe iqhinga lokunceda umphakathi lezikolo.
Injongo ngeyokuthi zonke izikolo isigaba ngesigaba zibe lezivande zezihlahla.
Izikolo kubikwa zizancediswa ekudonseni amanzi kusetshenziswa izibholane zemitshina ye Solar. Ezinye indawo ezizakuba yingxenye yohlelo lolu zigoqela i-Lupane State University eseLupane, Joshua Mqabuko Nkomo Polytechnic eGwanda, Falcon College, izikolo ezisezabelweni zeMatabeleland North kanye leSouth, ama-irrigation schemes aseGwanda, Bulilima lasesigabeni seSigodini.
Inkokheli zaloluhlelo, uAnthony Denga loZandile Matiwaza-Denga baveze ukuba bazakupha isigaba ngesigaba usaba lezihlahla ezithile ukuze ilizwe leZimbabwe lenelise ukulwisana lokuguquka komkhathi okudalwe yikuganyulwa kwezihlahla.
Bobabili laba, abangaphansi kweAfrican Grain and Seeds, ngomnyaka odluleyo basungula uhlelo lokuhlanyelwa kwebhida lezinye izilimo kuzigaba zeMatabeleland ngenhloso yokuncedisa uHulumende kuhlelo lokuthuthukisa ezokulima elizweni.
IAfrican Grain and Seeds yanikeza abalimi inhlanyelo ye-beetroot, khabitshi, imiqwente, ihanyanisi, i-butternut, amatamatisi kanye leyemibhida.
