Kuhlangana eziqhulayo zodwa eBF

13 Jun, 2019 - 00:06 0 Views
Kuhlangana eziqhulayo zodwa eBF

uMthunywa

YiNtatheli kaMthunywa

KUDALA iHighlanders leDynamos zazibizwa njengengqwele zomdlalo wenguqu kuleli ngoba zazinqoba amanye amaqembu zithwala lenkezo.

Kodwa khathesi amaqembu eligi yeCastle Lager la asesidla ngodumo lwakudala. Okukhona khathesi angeke kukhulunywe ngakho okunengi ngoba la amaqembu ayehluleka ukunqoba.

Zonke ziyaqhula nanko akukaze kwenzeke ukuthi inkunzi zikanobhutshuzwayo lezi zime mpo kunombolo engaphezulu kweyetshumi ngalesi isikhathi sesizini.

Amahlolanyama ahlezi kunombolo yetshumi lanhlanu ebelethe imiklomelo engu-11, iDeMbare ilemiklomelo engu-15 kunombolo yetshumi.

Zombili seziphenduke zaba yinhlekisa ebholeni zisedlulwa langamaqembu asachinsa ukuligiqa enkundleni ephezulu.

Ayadibana kulimpelaviki kudingwa njalo ukuthi yiphi enkulu kuleyinye enkundleni yeBarbourfields.

IHighlanders ingena kulumdlalo iphaphise umsila ngoba izigqaja ngokuthi isinqobe iDynamos kumidlalo yonke yeligi kusukela ngomnyaka ka-2016.

Leliqembu lizwisa abalandeli bayo ubuhlungu ngokwehluleka ukugcina umdlalo owodwa maviki wonke. Okumangalisa ngabadlali laba yikuthi bayakwazi ukudlala kodwa igedi abaliboni. 

Izazi zomdlalo zibalisa ukuba iBosso yalonyaka idlala ukwedlula zonke abake bazibona kuminyaka engamatshumi amabili.

Lomqeqetshi uMadinda Ndlovu katshayi inja efihla umphini ngalokhu ngoba ngeviki edluleyo ubuke wababaza umdlalo wabadlali wabika ukuthi uyasuthiseka loba bekhutha igedi.

Isazi senguqu yeHighlanders uNkululeko Tshambo uthe ibhola elidlalwa ngabafana abakhona kulisizini liyamangalisa.

Umsekeli walithimu uNdunduzo Ncube odume ngelithi “Teekay” ezihlalweni zeSoweto eMagumeni uthe ukuqina kweqembu likaMadinda kuzabonakala ngokunqoba iDynamos.

“Abanqobe ngamabhola amanengi kuDynamos, yikho sizavuma ukuthi iqembu libophile. Umdlalo wabo phakathi kwenkundla uyancomeka, kuhle sibili kodwa igedi licatshile.”

Enkambeni yeDynamos bakhala zome inyembezi maviki wonke. Okuphethe leliqembu kwehlukile kulokweBosso ikakhulu kusimo sethalenta labadlali. Engabe waphenduka uTonderai Ndiraya ukuzoqeqetsha kodwa imiklomelo lokhe isala.

Kusenjalo, ngoMgqibelo anduba kudibane eziqhulayo, iBulawayo Chiefs izadinga usizo inxusa intshantshu iFC Platinum eLuveve. 

Imidlalo yeCastle Lager kuliviki:

NgoMgqibelo:

-Bulawayo Chiefs v FC Platinum (Luveve Stadium)

-Chapungu v Yadah (Mandava Stadium)

-Black Rhinos v ZPC Kariba (NSS)

-Harare City v Herentals (Rufaro Stadium)

NgeSonto:

-Highlanders v Dynamos (Barbourfields Stadium)

-Caps United v Telone (NSS)

-Manica Diamonds v Ngezi Platinum (Vengere Stadium)

-Triangle United v Chicken Inn (Colliery Stadium)

-Mushowani Stars v Hwange (Rufaro Stadium).

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds