Kugug’ othandayo!… UDeco ubizwa nguSweswe esibayeni

16 Feb, 2023 - 00:02 0 Views
Kugug’ othandayo!… UDeco ubizwa nguSweswe esibayeni uDanny ‘Deco’ Phiri

uMthunywa

Nkosilathi Sibanda

ABADALA bathi guga sithebe kade wacholela, kodwa uDanny “Deco” Phiri uthi kugug’ othandayo.
Umdlali wenguqu lo, oleminyaka engu-33 yokuzalwa, usekhethwe ukuthi adlalele iqembu leBulawayo Chiefs ngesikhathi kucatshangelwa ukuthi engabe esephelelwe ngumphako.

Usuke eqenjini le-Golden Arrows ngesizini ka2021, lapho aqede isizini eselikhuhla ibhentshi ngemva kokudlala kulo kusukela ngo-2016. Uphenduke kuleli ngomnyaka odluleyo esevela kuqembu le-Diamond Trust Bank (DTB) eTanzania.

Ekusukeni kwakhe, uPhiri watshayisana lodaba lokuvalelwa kweZimbabwe Football Association kumdlalo wenguqu yinhlanganiso yeFifa, okwenza kwabanzima ukuthi athole iqembu phandle kwelizwe ngalesi isikhathi.

Danny “Deco” Phiri

Isehlakalo lesi saphazamisa iphupho lakhe lokuthi ayeqedela umdlalo wakhe ephandle kwelizwe.
Kunsukwana ezisanda kwedlula, uPhiri uvumelane lokudlalela Amakhosi Amahle aseqeqetshwa nguLizwe Sweswe.

Ngenyathelo lakhe, uPhiri umangalise abalandeli bomdlalo ngoba becabanga ukuba uzabeka ijogwe phansi.
Umqeqetshi weChiefs, uSweswe ubika ukuba ubona enze kuhle ngokuza esibayeni sakhe.

“Usengowethu sibili uDeco. Kuyakhanya ukuthi usaselawo umdlalo,” kutsho uSweswe.
“Kuye ngikhangelele ukuthi abeyinsika yeqembu, esebenzisa ubungcwethi lobungcitshi bakhe abuthola kuminyaka yonke le edlalela amaqembu amakhulu.”

Ngokudlala, uPhiri uyimvimbi. Abalandeli bomdlalo kuleli bamazi ehudula emuva eyimvimbi kumaqembu abalisela iChicken Inn.

Esakhula emdlalweni, uPhiri wazakhela udumo ekumaqembu eRailstars le- Amazulu FC. Ngo-2009, uPhiri wadlalela iBantu Rovers lapho adlala khona okwamasizini amabili. Ngo-2015, ekuChicken Inn wathola isicoco seSoccer Star of the Year ngesikhathi leChicken Inn layo inqoba inkezo yeCastle Lager.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds