KUGELEZE igazi eMaotana eNanda, eSouth Africa ngempelaviki, kudutshulwa, kubulawa abayisithupha abasolwa ngokuthwalisa nzima umphakathi ngobugebengu.
Ngokuthola kwentatheli, abafi bahlaselwe emakubo, liqula ebelihlome ngezibhamu langamabhemba.
Umthombo ocele ukungavezwa, uthe abafi basolwa ngokubulala ngokuhlanganyela isakhamuzi, ngoLwesine.
Uthe kuthe uma oyedwa wabo eyobuzwa ngalokhu, wadubula ebhekise kwabebeyombuza.
“Lusuke lapho ke uthuthuva, umphakathi wadinwa, wahamba ubangenela ngabanye ngabanye, ubadubula,” kutsho umthombo.
Ilunga lophiko oluqapha ubugebengu endaweni lalo elicele ukungavezwa, lithe umphakathi ubabulele ngoba ubusukhathele ngobugebengu babo.
“Bebeyizigebengu. Umphakathi uthukuthele ngoba bayacanasa emphakathini. Badubula babulale umphakathi, bawuphuce izinto zawo emini ilanga libalele. Umuntu adubule umuntu ambulale, embulalela iselula kaR200,” kutsho ilunga lophiko.
Okhulumela inkampani yabonogada ehambela zonke izindawo zezehlakalo, iReaction Unit South Africa (Rusa) uMnumzana Prem Balram, uthe kusehlakalo sokucina esenzakale ngoMgqibelo emini, iqula libulale owesilisa (52) eqeda kuphuma endlini yakhe.
Umthombo uveze ukuthi kulesi sehlakalo, iqula lithe liyamdubula, wangadubuleki, lacina selimgeca kuqala, lase limphinda isibili ngesibhamu, wabe eseyadubuleka.
UBalram uthe kusehlakalo esingaphambi kwaleso, okuthiwa senzakale ngabo-10 ekuseni kuhlaselwe omunye owesilisa (42), ophoqwe ukuthi aphume endlini yesihlobo sakhe ngaphambi kokuthi adutshulwe kuphindelelwa kubuka izihlobo.
Kuthiwa bagasele kubo, bangamtholi ngaphambi kokuthi bambone ematasa esidla emzini wesihlobo oseduze, banikela khona, bafika bamdubulabephindelela.
“Abezimo eziphuthumayo enkampanini yethu, bebesematasa ngaleso sehlakalo ngesikhathi betshelwa ukuthi kukhona omunye odutshulwe ngabantu abafanayo endaweni ebude buduze lalapho abakade bekhona,” kutsho uBalram.
Uthe kokwenzakale ngoLwesihlanu, kudutshulwe owesilisa (43) obematasa elekelela ngesikhathi kusenziwa amalungiselelo omngcwabo komakhelwane wakhe.
“Kuthiwa yena, abasolwa baqale bambuza ngesibhamu sakhe, kwathi uma ephendula ngelithi akalaso, bamdubula,” kutsho uBalram.
Amapholisa abengakayiphenduli imibuzo athunyelelwe yona ngalezi zehlakalo.-Isolezwe
