uMthunywa
Nkosilathi Sibanda
ZINDABA ezimnandi kulabo abagijimela ukuthola umvuzo kumjaho omkhulu owePPC Matopos 33-Miler nanko phela abaqoqi bawo babike ukuba ozaqamula intambo uzathola iRTGS $3 000.
Lokho kutsho ukuba abalitshumi abazaphutsha umjaho ngokuphangisa labo bazaphiwa imivuzo ekhweziweyo.
Kubikwa abaqoqi bomncintiswano, ngemva kokuhlaziya isimo somkhonomi welizwe, bakubone kungcono ukuthi umjaho ubelemivuzo ehloniphekayo.
Umvuzo womnyaka odluleyo owe-$1 000 ubungeke uhuge abagijimi kuzwa kulumjaho olodumo lokuba lengcitshi zokugijima ezivela lakwamanye amazwe.
NgoMgqibelo ekuseni uyaqala umjaho wePPC Matopos 33-Miler usukela enzikini yeMatobo National Park usiyaphelela eBulawayo Athletics Club.
Umncintiswano lo ulezigaba ezine ezibalisa i53 kilometres, 21km, 10km le5km.
Ekhuluma loMthunywa kuliviki umaneja omkhulu kuPPC Zimbabwe uKelibone Masiyane uthe bakhangelele ukuthi kuphatheke abagijimi abedlula i3 500 ngoba umjaho wabo usumemethekile lasezizweni eziphetsheya.
“Selisondele ilanga lokugijima kumjaho wethu wePPC Matopos 33-Miler, ngoMgqibelo mhlaka 6 Mabasa. Bonke abafuna ukugijima sebevunyelwe ukuthi babhalise .
“Inhloso yethu ngeyokuthi siphakamise umdlalo wokugijima lokukhankasela ukuthi abantu bakithi bafunde ukuhlala beqinisa imzimba yabo. Lokhu kutshengisela ukuzimisela kwenkampani ukuthi isebenzelane lozulu ngendlela eletha ukwezwana lempumelelo,” kutsho uMasiyane.
UMasiyane uthe ukukhwezwa kwemivuzo bekubalulekile.
“Umjaho wePPC Matopos 33-Miler usungumjaho olodumo umhlaba wonke. Ngakho kuhle ukuthi sigcine ibizo lalumjaho ngendlela ezahuga abagijimi abaphatheka lakweminye imijaho elodumo.”
Uqhubeke wathi lonyaka akulamuntu ozalahleka.
Ngo2017 bakhona abagijimi abalahleka indlela okwacina kuphambanisa ukuphetha komjaho.
Ukukhwezwa komvuzo lo kukhangelelwe ukuthi kudonse inengi labantu abaphila ngomdlalo wokugijima kanye lalabo abazizwa belentshukuntshu yokunqoba lonyaka.
Inhlanganiso yeBulawayo Athletics Association ithe abalesifiso sokugijima i53km bazakhupha i$25 kuthi labo abaphatheka kumango oyi-21,1km bazakwehlukana le$20.
Kubikwa kuvunyelwe lokubhadala ngemali yeMelika.
Umgcinisihlalo we-Bab uManuel Mpofu uthe ngokwanda kwabantu ababhalisa ukugijima, lonyaka kuzabe kuncintiswana okuzwayo.
“Sikhangelele ukuthi kube labantu abanengi ukwedlula ngo2018. Umjaho wePPC Matopos 33-Miler uthandwa linengi labantu abagijimela ukunqoba lalabo abaphatheka ukuthi baqinise imizimba yabo. Siyakwamukela ukuthi imivuzo ikhweziwe, kuyisikhuthazo kumdlalo wokugijima kuleli olokhe usalele emuva ngosekelo lwemali,” kutsho uMpofu.
Minyaka yonke nxa kuqhutshwa umjaho lo, inkampani yePPC Zimbabwe yandise ukuphathisa lomphakathi weMatopo. Ngomnyaka odluleyo, inkampani yePPC Zimbabwe yakha isikolo yaphinda yancedisa ukwakhiwa kwekilinika kulindawo.
Kusenjalo uMasiyane uthe sebehlangane leZimParks, abagcini beganga leMatobo National Park ukuze bencedise abagijimi ukuthi bathole izindlu zokulala.
Isivumelwano seZimParks lomjaho weMatopos lo uyisiqalo kwezemidlalo njalo ukhangelelwe ukuthi uphakamise lenhlelo zokwethekelela indawo zasendle kuleli.
