NGOLWESITHATHU kuyonale iviki abantu beziqintini ezibalisa iZenka, eZinyangeni, Guwe kanye leDimpamiwa eNkayi bajabulele ukugcotshwa kwenduna yabo entsha uZwelani ayanda Ndiweni oyindodana kaGilford Ndiweni owabhubha kuminyaka emine edluleyo.
Induna entsha ileminyaka engu-25 yokuzalwa njalo ingumfundi eNyuvesithi yeMidlands State eGweru lapho etaditsha izifundo zeBachelor’s Degree in Local Government.
Umphathintambo wogatsha lweLocal Government, Public Works and National Housing uKhomuredi July Moyo ukhuthaze induna ukuthi isebenzelane lohulumende kuzozonke inhlelo zentuthuko ukuze kube lengqubekela phambili esigabeni.
UKhmrd Moyo uthe ulimi lwesiNdebele luyingxenye yendimi ezisemthethweni kuleli njalo lumqoka ekulondolozeni amasiko kanye lemikhuba yamaNdebele kuzizukulwane lezizukulwane.
Wengezelele ngokuzinikela ukuthi uzabhadalela induna le imali engange$1 200 yesikolo ethi kuyinto enhle ukuba induna zakulezinsuku ziqakathekisa ezemfundo.
Â