Uncategorized

Kufika uluhlu lwesibili lwemithi yeCovid 19

18 Mar, 2021 - 00:03 0 Views
Kufika uluhlu lwesibili lwemithi yeCovid 19 uMongameli Mnangagwa lomsekeli wakhe uChiwenga kanye lo Chinese ambassador uMnumzana Guo Shaochun besamukela uluhlu lwesibili lwemithi yokuvikela isifo seCovid 19 evela eChina eRobert Mugabe International Airport, eHarare

uMthunywa

ILIZWE leZimbabwe libe ngelakuqala kuzwekazi le-Africa ukwamukela uluhlu lwesibili lwemithi yokuvikela isifo seCovid 19 evela eChina njalo uMongameli Mnangagwa uthe lokhu kutshengisa ukuthi ilizwe selenze amanyathela amqoka ekulwiseni ubhubhane lolu.

Umongameli Mnangagwa wamukele uluhlu lwesibili lwemithi le engu-200 000 eyeSinopharm enikezwe ilizwe leZimbabwe yiChina kanye lengu-200 000 eyeSinovac eyathengwa yiZimbabwe kulelozwe eRobert Mugabe International Airport.

Kunyanga edluleyo ilizwe lamukele njalo ingxenye ymithi le engu- 400 000 ivela elizweni leChina.

Ukufika kwemithi le ivela kweleChina kuza ngesikhathi lizwe lihlaba uzulu amajekiseni alumuthi kuvikelwa ukumemetheka komkhuhlane weCovid-19 ngamahlandla.

Ekulwiseni iCovid-19, ilizwe leZimbabwe selibeke eceleni imali engange US$ 10 million ezasetshenziswa ukuthenga imithi le uMongameli athe imqoka ekwenzeni isiqiniseko sokuthi umkhuhlane lo awusathelelwana ngesiqubu akade uthelelwana ngaso.

Ekhuluma ngemva kokwamukela imithi le ngoLwesibili, uMongameli uthe ukuza koluhlu lwesibili lwemithi le kuphawule elinye njalo inyathelo lengqubekela phambili ekuqiniseni ubuhlobo phakathi kwelizwe leZimbabwe leleChina.

“Senza kuhle ekulwiseni ubhubhane lolu ngohlelo lwethu lokuhlaba uzulu.

“Sithanda ukubonga ilizwe leChina ngokusisekela kuhlelo lolu. Lokhu kugoqela ukusinikeza ulwazi, impahla yokuzivikela kanye lemithi.

“Ukuthi yithi sodwa isizwe e-Africa esesithole uluhlu lwesibili lwemithi evela eChina, kuveza ukuqina kobudlelwano bethu lelizwe leChina. Sikhangelele ukuba siqhubeke siqinisa ubudlelwano lobu ngemva kokunqoba ubhubhane,” utsho njalo.

UMongameli obelo Chinese ambassador uMnumzana Guo Shaochun, ubonge kakhulu uMongameli wakwele China uXi Jinping kanye leChina ngokusekela ilizwe leZimbabwe lokhu athe sokwehlise umthwalo weCovid-19 kwaphinda kwaba lomthelela omuhle kwezempilakahle kanye lokusila kwabantu.

UMnumzana Guo olinxusa leChina kuleli utshayele uMongamali Mnangagwa kanye loHulumende ngokwenelisa ukwehlisa umthelela wegagasi lesibili kanye lokuqala ukuhlaba uzulu imithi yeCovid-19.

Uthe iChina izimisele ukusebenzelana lamazwe omhlaba ekuwasekeleni ukuze athole imithi yeCovid-19.

Wengezelele wathi iZimbabwe ibiphakathi kwamazwe akuqala ukuthola imithi le ivela eChina njalo ingelinye ilizwe kwamalutshwane ukunikezwa imithi le kabili, okutshengisela ubudlelwano obuhle kanye lokubambana kwamazwe la omabili.

UMphathintambo wezempilakahle uVP Chiwenga uthe ngemithi le ingene elizweni ilizwe liphatheke ngokuqhelisa uhlelo lwalo lokuhlaba abantu kugoqela amanye amaqula afana lababalisi, abaphathi bamabandla ezokholo kaye lalabo abalemikhuhlane engelaphekiyo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds