uMthunywa
YiNtatheli kaMthunywa
KULOWESIFAZANE obotshwe kulandela ukuzingcwabela umntanakhe oleminyaka yokuzalwa emibili eyedwa okusolelwa ukuba angabe enguye ombuleleyo.
Umsekeli wesikhulumi samapholisa eMaShonaland Central, uAssistant Inspector Naison Dhliwayo uthe uPortia Chivani (32) odabuka esiqintini seSika ngaphansi kwenduna uMusana eBindura ubotshelwe icala lokungcwaba umntanakhe oyinkazana eyedwa.
“Sibophe owesifazane obizwa ngokuthi Portia Chovani owangcwaba umntanakhe eyedwa. Kucatshangelwa ukuba inina leli lingabe lazibulalela umntwana kungakho-ke lisezandleni zamapholisa, icala leli lisacwayisiswa,” utsho njalo.
UAssistant Insp Dhliwayo uthe mhlaka 17 Mabasa ngezikhathi zehola lika 5 ntambama amapholisa enkamba yeRutope, eShamva athola udletshana lokuthi kulomntwana omncane owayengabonakali, aqala ukumdinga.
“Amapholisa afika emzini wenina leli elingumsolwa alibuza ukuthi umntwana ungaphi lona lathi usesiqintini sika sobhuku Guwa. Amapholisa ahamba khonale koGuwo amdinga amswela.
“Bekhonale inina leli latshintsha indaba laqala ukuthi umntwana wagula kakhulu kusukela ngomnyaka ka 2020 wabhubha phakathi kwamhlaka 7 lo 8 Mabasa, laselinakana ukuzingcwabela engcwabeni elingatshoniyo kwenye indawo eligceke,” atsho njalo amapholisa.
Egcekeni lapho angcwaba isidumbu somntwana kusemasimini esinye isakhamuzi. Umsolwa kubikwa uthi wanakana ukungcwaba isidumbu somntwana eyedwa ngenxa yokuthi abadala ahlala labo bala ukumnikeza indawo yokuthi angcwabe umntanakhe.
“Uthi abadala ahlala labo bala ukumnika indawo yokungcwaba umntwana nanko phela bathi kasimuntu odabuka kuleso siqinti.
‘‘Ngalokhu wagebha ingcwaba elitshona okwe 50cm wasegqibela isidumbu somntwana eyedwa ensimini ka Tambudzai Motsi (43),” utsho njalo uAsst Insp Dhliwayo.
Ucwaningo olwenziwa ngamapholisa luveze ukuba umntwana lo owabhubhayo wayelomkhuhlane wekwashiokor.
“Okuhluphayo okuphume kucwaningo lwethu yikuthi kungani kungelamuntu owazama ukumphathisa ukungcewaba umntwananxa wabhubha ngemva kokugula. Amapholisa abhala incwadi yokuba isidumbu sigejwe mhlaka 18 Mabasa avunyelwa enza lokhu phambi kuka sobhuku wesiqinti lesi, uBernard Sika. Isidumnu sasiwa esibhedlela seBindura ukuze siyehlolwa.”
UAsst Insp Dhliwayo uphethe ngokuthi: “Sikhuthaza ukuthi nxa kungaba lemfa, abantu baphathisane ngoba phela ukufa akusi komuntu oyedwa kungenzakala lakuwe kusasa”.
