Ethel Ncube
KWEHLE iyezi elimnyama kwenye imuli yeBinga, ngaphansi kwenduna uDobola lapho okutshe indlu ilabantwana phakathi, okubangele ukuthi oyedwa edlule emhlabeni, abanye bakhe batsha ngendlela ebuhlungu.
Lokhu kwenzakale ngoLwesibili ekuseni lapho umnikazi womuzi abone khona indlu isisitsha abantwana bephakathi.
Abantwana abatshele endlini ngu-Chishomezyo (13), Praise (6) Chibotu (4) loLwengelelo (8).
Ikhuluma lentatheli, induna uDobola iveze ukuba balusizi ngesiga esehlele abantwana laba.
Induna uDobola
“Kubuhlungu kakhulu okwehlele imuli le. Abantwana laba akwazakali ukuthi umlilo otshise indlu uqale njani. Umuntu obone sekusitsha ungene phakathi esiyakhipha abantwana bevele sebetshile, kwathi oyedwa okhitshwe ekucineni ubevele esehitshwe yintuthu njalo etshile kakhulu.
“Babagijimisele ekilinika eseduze bathi befika lo omunye bathi sekuyisikhathi edlule emhlabeni. Abathathu laba badluliselwa esibhedlela seBinga Centre labo ngesimo abayisona kuzangenela iNkosi ngoba batshile njalo bayafuthelwa,” kubika induna uDobola.
Uqhubekele phambili ecela uncedo kwabenelisayo.
“Sicela abenelisayo bancedise ngempahla zabantwana zokugqoka kanye lengubo ngoba akulalutho oluphumileyo, okwenzakeleyo yikukhupha abantwana kuphela. Bathe beqeda kubakhupha uphahla lwahle lwawela phakathi akulampahla ephumileyo. Njengenkokheli, ngixwayisa abazali ukuba nanzelelani ukuba alitshiyi amakhandlela kumbe amalayithi egcekeni lezinto zokulayithisa eduzane.
