uMthunywa
Ethel Ncube
KWEHLE iyezi elimnyama kwenye imuli elokitshini leSizinda koBulawayo ngemva kokuba enye indoda (45) itshaye umzukulu wayo, oleminyaka engu-11 wafa.
Ngokuzwa lesi isehlakalo, ugogo walumzukulu laye, kubikwa uqaleke wedlula emhlabeni esizwa ngalokhu.
Kubikwa ugogo ubevele esesibhedlela seMpilo nanko ubengezwa kuhle kulandela ukutshaywa yimota.
isibhedlela seMpilo
Insindabaphenduli le yenzakale ngoLwesibili ngeviki edluleyo lapho umetheswacala uNhlanhla Moyo atshaye umzukulu wakhe esithi umfundisa inhlonipho waze wadlula emhlabeni.
Kubikwa uMoyo wagcina isidumbu somzukulu wakhe endlini kusukela ekuseni waze wayabikela amaphilisa emini.
Kuthe ababesiyabona ugogo esibhedlela bathi bembikela wahle waqaleka wedlula emhlabeni ngosuku olufanayo.
Iphephandaba likazulu lizwe kubafakazi abaqotho kulindaba ukuthi lakhathesi imuli le iyehluleka ukuthi ihlaliseke ngokwenzakaleyo.
Intatheli izwe ukuthi ugogo kunye lomzukulu lokhu bengakabekwa (ngoLwesibili).
Ekhuluma lentatheli omunye wezakhamizi ongumakhelwane uMnumzana Sazisani Dube uthe isehlakalo lesi siveza okunengi ngokuhlalisana kwabantu ezimulini langendlela abantwana abakhuzwa ngayo.
Uthe balesithuli ngodaba lolu.
“Silesithuli njalo silokudana ukuba sekutshone abantu ababili ngasikhathi sinye ngento ebingakhulunywa emphakathini,” kutsho uMnu Dube.
Umalume lo watshaya umzukulu ethi umfundisa umthetho waze wafa waqeda wahamba emapholiseni wathi umntwana ulele kavuki yena emtshaye waze wambulala.
“Ngesikhathi umntwana esetshonile kwabikelwa ugogo yena owayesesibhedlela, laye uthe esizwa umbiko lo wedlula emhlabeni.
Sezimbili izidumbu emzini owodwa,” kubika uMnu Dube.
Ngesikhathi uMthunywa edinga ukukhuluma lemuli le, akula obefuna ukuvula umlomo, ikanti bekungaveli sobala ukuthi nguphi ongakhuluma lentatheli.
Omunye olilunga lemuli, owale ukuqanjwa ngebizo, uncwebe intatheli indlebe wathi okwenziwe nguMoyo kubalethele umnyama.
“Lo ngumnyama onzima olethwe ngumalume uNhlanhla.
Siyazibuza ukuthi ungenwe yini emenze watshaya umntwana waze wafa loba esithi ubemfundisa.
Abantwana asali ukuthi bayatshaywa kodwa lokhu kuveza ukuthi umtshaye ngendlela engayisiyo.”
Isikhulumi samapholisa koBulawayo uInspector Abednico Ncube uthe umbiko onjalo usewamukele.
“Udaba lolu siluzwile njalo siphezulu kokuluphenya.
Ludaba oluveza ukuhlukumezana okukhona ezindlini.
Luchuku olwenziwe emntwaneni ongelacala njalo engenelisi lokuzivikela.
Sikhuthaza uzulu ukuba abelothando.
Izihlobo azikhuze abantwana kuhle, kulokuthi zibatshaye besithi babafundisa inhlonipho,” kutsho uInsp Ncube.
