YiNtatheli kaMthunywa
KUBULEWE umdlali we-boxing uNdanatsei Nyamukondwa esendleleni yokuza koBulawayo elande umncintiswano obuzaqhutshelwa elokitshini leSizinda.
Umdlali lo obelisotsha, ubekhangelelwe ukuthi azojika izibhakela emisana lamanye amadoda kubangwa isicoco.
Lumncintiswano weSizinda obuhlangane lomdlalo we-wrestling bekumele udlalwe ngeviki edluleyo kodwa wedluliselwa kulimpelaviki kulandela isehlakalo salumdlali.
Umqondisi we-boxing kunhlanganiso yeZimbabwe Boxing Federation uthe bakubone kufanele ukuba kumiswe umncintiswano ngeviki edluleyo.
“Umdlali lo kubikwa ufe ngesikhathi esalinde amabhasi.
Ubulewe yizigebenga ebezifika itshumi. Kubikwa lokhu kwenzakale elokitshini le-Epworth umuyi elinde izimota.
Sizwe ukuba kube lokungazwani phakathi kwezigebengu lezi ziphuma kwenye ibhawa.
Umuyi ufe ngemva kokubuza ukuthi kwenzakalani ngesikhathi ebona isixhobexhobe.
“Ngenxa yalokhu, sithe kungcono sidlulisele imidlalo yethu yeSizinda phambili, kulimpelaviki.”
Phakathi kwabadlali abazakholisisa uzulu babalisa uFuture “Nurse” Maziya owe-Hwange osemofuze izihlathi zamadoda amanengi.
Umdlali lo nguye intshantshu yama-Zimbabwe National Youth Games ka-2017 kuhlandla labasacathula emdlalweni.
Abadlali bamakilabhu alolonga koBulawayo abalisa iSizinda, iLobengula leTshaka bakhangelelwe ukuthi babe banengi.
Ekhuluma loMthunywa uMasiyambumbi ubike ukuba kuzaphatheka izabelo zonke zelizwe kanye lequla le-Zimbabwe National Army.
Kuzancintiswa kumahlandla abalisa abasakhulayo, lalabo abaleminyaka engu-40 kusiya phezulu.
Uthe loba bengelalo usekelo olweneleyo, uNdebele nguye yedwa ohamba phambili ngokuncedisa ngemali kumdlalo we-boxing.
“Sikhangelele ukuthi samukele abadlali abanengi. Imidlalo yonke izasetshenziswa ukukhetha iqula elizadlalela iZimbabwe kumncintiswano weWorld Championships olandelayo.”