uMthunywa
YiNtatheli kaMthunywa
ISIGABA seMutasa esisesabelweni seManicaland sibhekane lohlupho olukhulu lokuqhamuka komkhuhlane wendingindi nanko sokufe abantwana abangu-23 ngesifo lesi phakathi kwamaviki amabili adluleyo.
Kuze kufike khathesi kutholakale abantwana abangu-132 belomkhuhlane lo ngemva kokuhlolwa njalo abezempilakahle sebeqale uhlelo lokuhlaba abantwana ijekiseni yokuvikela abantwana abafika-78 000 abasendaweni le.
Uhlelo lokuhlatshwa kwabantwana ijekiseni le kubikwa lubuyiselwe emuva yikukhwela kwenani labantu akade behlaselwa yisifo seCovid-19.
Ngaphandle kwalokho kulabanye abakhonza iPositoli abangafuni ukuthi abantwababo bahlatshwe ijekiseni okwenza kubelodubo lokuqeda isifo lesi.
Ingxenye yedolobho leli ekhangela mayelana lokuvikela ingozi eyeCivil Protection Unit (CPU), khathesi isendaweni okukhwele khona isifo njalo ikhuthaza ukuba abantwana bayohlatshiswa ijekiseni yokubavikela.
UDokotela Cephas Fonte onguDistrict Medical Officer eMutasa uthi kusukela mhlaka 23 Mabasa isifo lesi sakhwela, abantwana abangu-61 000 sebehlatshiwe ijekiseni, “Silohlelo lokuhlaba abantwana abangu-78 000 ijekiseni, khathesi sesihlabe abangu-61 802.
“Sathola imbiko yokuthi kulabantwana abangu-135 abahlaselwe yisifo lesi, njalo abantwana abangu-17 bafe ngenxa yendingindi. Imbiko eminengi ngeyabangena isonto yePositoli labo abangakholelwa ekuhlabeni ijekiseni,” kutsho uDr Fonte.
Uthe ingxenye yeCPU lamanye amaqembu anika izixwayiso emphakathini ngokuqakatheka kokuthi abantwana bahlatshwe ijekiseni yokuvikela isifo lesi.
“Ingxoxo lezi zilezithelo ngoba abakhulu bamasonto la sebevumela abantwana babo ukuba bahlatshwe. Abantwana laba banathiswa iVitamin A ngenjongo yokuqinisa amasotsha omzimba alwisa izifo,” kutsho uDr Fonte.
Laba abasila kusifo lesi, balakho ukuhlangana lokulimala emzimbeni okugoqela ukungaboni lokungezwa endlebeni.
