uMthunywa
Bongani Ndlovu
KUMENYWA uzulu eBusters Sports Club eFairbridge lapho okuzabe kulomqhudelwano webhola we-5-Aside round robin tournament.
Ekhuluma lephephandaba likazulu omunye wabahleli bomcimbi uVictor Giyani uthe uthanda ukumema uzulu wonke kuMakhosi Cup eBusters lapho okuyabe kudlalwa umdlalo we-5-Aside, kudliwa njalo kugiywa.
“Umcimbi wangempelaviki ngokazulu wonke asikhethi loba ngubani njalo asikhangeli leminyaka ngoba kungumcimbi wokuthi sihlanganisa abantu abavela endaweni ezehlukeneyo ngomdlalo webhola.
“Injongo yethu ngeyokuthi sikwazi ukuhlanganisa abantu abavela endaweni ezehlukeneyo ukuze bakwazi ukuqakatheka kokuxoxisana njalo sizathola lamathuba okuthuthukisa amathalenta abadlali bebhola,” kuveza uGiyani.
Uqhubekele phambili waveza ukuba amaqembu afuna ukuba yingxenye ye-tournament le kumele abhadale imali yawo yokungena.
“Amaqembu afuna ukuzodlalela iAmakhosi Cup kumele akhiphe imali engangeRTGS$50 ukuze enelise ukuthi adlalele imali enkulu iRTGS$300 njalo kuzabe kulezipho zabadlali abadlale kuhle, abaziphathe kuhle labadlale ngomoya wokuthula ku-tournament yangempelaviki,” kuchasisa uGiyani.
Uphethe ngokuthi asekhona amaqembu asebhalisile ukuthi abe zingxenye loba esakhatshana kulalawo abawadingayo njalo kuzabe kulabonompembe abavela eZifa.
“Asekhona amaqembu angaba ngu-15 asebhadele abhalisa ukuthi abekhona ngempelaviki thina lonyaka sikhangelele ukuthi sibe lamaqembu angu-40 njalo kumenywe labonompembe abangu-7 beZifa ukuthi babuye bezoncedisa ekutshayeni impembe kumidlalo yethu,” kuphetha uGiyani.
