uMthunywa
Bongani Ndlovu
ZIKUTHOLILE ebezikudinga izithandwa zeqembu lezwe lonke ngeSonto emini lapho amaHlolanyama ecitshe amagetsi eZPC Kariba eMagumeni ku-semi yesibili yeChibiku Cup ngebhola elilodwa eqandeni.
Ngokunqoba kwayo iHighlanders ngeSonto kuyitshiye isalelwe ngumdlalo owodwa ukuthi ithathe inkezo yeChibuku, into abalandeli kanye labadlali abayicina ngomnyaka ka2013 lapho iqembu liphakamisa inkezo yeMbada Diamond.
Uqhubeke njalo ukuvutha umlilo kaPrince Dube wokutshaya amambule, nanko uthumela iBosso ku-final ngokuhlohla kwakhe eMagumeni. Ukuhlohla kwakhe kutsho ukuthi uPrince sehlohle kuyo yonke imidlalo yeChibuku aseyidlalile lonyaka.
Ekhuluma lentatheli umqeqetshi weBosso uHendrik Pieter ‘‘Hlabangana’’ de Jongh uthe ulesibongo esikhulu kubalandeli beBosso abangayiphanga indawo yokuphefumula iZPC Kariba bencoma abadlali babo.
“IHighlanders ilabandeli abahle kakhulu abazingcitshi ekulandeleni iqembu labo, njalo lapho angiphikiswa, hayi iDynamos, kodwa iHighlanders yiyo elabandeli abazingcitshi iZimbabwe yonke. Abalandeli beBosso balomdladla wokulandela iqembu njalo ngiyakuthanda lokho,” kuveza uHlabangani.
Uqhubeke waveza ukuthi abalandeli beBosso bangumdlali wesi-12 enkundleni yikho nje benqobile ngempelaviki.
“Ngangitshilo phakathi kweviki ukuba abalandeli bengabuya ngobunengi babo, ngeke sehluleke ukunqoba. Abalandeli bebebahle kakhulu lamuhla belandela iqembu. Ngilethemba ukuba bazaqhubeka bebuya ngobunengi babo enkundleni ngoba bengumdlali wethu wesi-12. Iqembu leli lihle kakhulu, njalo kuyintando yalo ukuba ku-final yeChibuku,” kuphetha umqeqetshi “Hlabangana” de Jongh.
IBosso isisalelwe ngumdlalo owodwa leNgezi Platinum FC ngaphambi kokuba iphakamise inkezo yeChibuku. Inkezo yeChibuku izaletha ithuba lokuba umanqoba ayodlala kumqhudelwano weCaf Confedarations Cup lezinye zezingqwele zeAfrica, into esibonwa komakhelwane kweBosso.
