Uncategorized

Kudingwa usizo eNkayi. . . izakhiwo zabhidlizwa yizikhukhula

12 May, 2022 - 00:05 0 Views
Kudingwa usizo eNkayi. . . izakhiwo zabhidlizwa yizikhukhula

uMthunywa

YiNtatheli kaMthunywa

UHULUMENDE encedisana lengatsha lamabandla ezokholo azimele wodwa usesukumele phezulu ukuze aphathise umphakathi wesiqintini seJabulisa eNkayi kulandela izikhukhula ezibhidlize izakhiwo lemigwaqo ngenyanga edluleyo. 

Izikhukhula lezi zatshaya kulindawo mhlaka 20 Mabasa. 

Abantu basala besegcekeni nanko phela izindlu zadilika, balahlekelwe yizifuyo, izakhiwo zomphakathi kunye lemigwaqo.

Ngokusabalala kombiko walesi sehlakalo, ibandla leBrethren in Christ Church libe ngelinye elinanzelele usizi olubhekane lendawo le, lakhetha ukuthi liphathise ngokunikeza impahla kumuli ezilahlekelweyo ngoMvulo.

I-Brethren in Christ Church ibonise umusa ngokunikeza impahla zokugqoka lezinye izinto kumuli eziphathekileyo.

UMfundisi walelibandla uReverend Ndabezinhle Nyathi uthe abasoke badinwa ngokuncedisa.

“Sihlangane njengebandla ukuze sisekele abahlaselwe yizikhukhula eNkayi. Lokhu esikwenzileyo akupheleli lapha. Sizaqhubeka sisenzenje,” kutsho uRev Nyathi.

Kulumbuthano wokunikeza impahla, ummeli weNkayi North kudale lePhalamende uSithembiso Nyoni, ophinda abe nguMphathintambo wezokuphathwa kwenhlelo zabesifazane, umphakathi lokuthuthukiswa kwamabhizimusi asakhulayo, wengeze isibongo kumakholwa kubandla le-Brethren in Christ Church.

“Isimo sibi kulindawo. Sibonga isipho esivele kubandla le-Brethren in Christ Church. Ngithanda ukwengeza isicelo sokuthi siphathise ngalokho esilakho kumuli ezilahlekelweyo.” 

Kusenjalo, izanuse zomkhathi zichaze ukuba ukuguquka komkhathi okwenzakala kulezinsuku kungabe kuyimbangela yalesisehlakalo.

Lonyaka izulu alizange line ngendlela ebikhangelelwe kuzabelo zeMatabeleland, okuveza ukuthi umkhathi usuguqukile njalo sekwande izikhulula lokutshisa kwelanga okwedlulisileyo.

Isazi kwezokuhlolisiswa kwenguquko yomkhathi uNkosaza Noleen Nyoni owenhlanganiso yeClimate Change Focus, wazise uMthunywa ngoLwesithathu ukuba ukuguquka komkhathi kuyimbangela yezehlakalo zomkhathi ezingajwayelekanga.

“Ukutshintsha komkhathi kumele sikunanzelele njalo sihlale siqaphele ukuthi kukhona. Izikhukhula zikhona, umqando lokoma kukhona. Okubalulekileyo yikuthi sihlale siqaphele, sibe kusimo sokuthi umphakathi ube lolwazi kokuzivikela,” kutsho uNkszn Nyoni. 

Share This:

Sponsored Links