uMthunywa
Nkosilathi Sibanda
INHLANGANISO yeMatabeleland Amateur Swimming Board (MASB) isikhuthaze abalandeli bomdlalo wokubhukutsha edolobheni lakoBulawayo ukuthi baze ngobunengi babo kumqhudelwano omkhulu oweZimbabwe Senior National Championships, ozaqala ngoLwesine usiyaphela ngoMvulo.
Lo ngumncintiswano wakuqala wokuvula umnyaka kulumdlalo. Kuzadibana intshantshu zakoBulawayo, Harare, Midlands, Manicaland, Mashonaland Country Districts, Matabeleland South leMatabeleland North.
Izabelo lezi yizo ezaziwa ngokuphatheka kumdlalo wokubhukutsha, zincediswa kakhulu yikuba khona kwezakhiwo zalumdlalo.
Ukuhlangana esizibeni seBulawayo City Pool kuyisitshengiselo sokuba idolobho lakoBulawayo lilungele ngokupheleleyo ukuqhuba imncintiswano yaphezulu.
Ekhuluma lephephendaba likazulu ngoLwesithathu emini, umgcinisihlalo weBulawayo Amateur Swimming Association uPhawulani Ngwenya uthe sebekulungiselele ukuqhuba imidlalo.
“Sesilungele ukuqala lumncintiswano. Amalungiselelo ahamba kuhle kakhulu,” kutsho uNgwenya.
UNgwenya wazise ukuba badonse isikhathi belungisa ichibi leBulawayo City Pool njengoba umdlalo we-swimming ubuvaliwe okwesikhatshana.
Ibhukutsho leBulawayo Pool
“Ichibi likusimo esihle okwamanje. Sisanda ukukhanyisa inkundla kunye lendawo lapho okuhlala khona ababukeli.
“Sikhuthaza abantu bakoBulawayo ukuthi babuye ngobunengi bezobukela ingcitshi zokubhukutsha,” kutsho uNgwenya.
Uthe bakhengelele ukunxusa abadlali abangamakhulu amathathu.
“Iqembu leHarare yilo eliza lababhukutshi abanengi, phose isilinganiso sengxenye ekhulwini ngoba lilababhukutshi abangu-150. Isabelo sakoBulawayo sona singaba lesilinganiso sababhukutshi abayi-30 phesenti.”
Kusenjalo, inhlanganiso yeMASB ibika ukuba ikhangelele ukuthi iqoqe umncintiswano wabasakhulayo kunyanga ezilandelayo.
KoBulawayo umdlalo wokubhukutsha usuthole abalandeli ngenxa yokuzimisela kwamaqembu abalisa iZambezi Tigers, Barracudas, Falcon, Crusaders, School of Swimming, Petra Academy, Stingrays, Dolphins lePenguins.
Kulandela ukuvulwa kwamachibi eLuveve, Mpopoma laseBarbourfields, kulindwe ukuthi labantwana abahlala emalokitshini basukumele phezulu kulumdlalo.
