Uncategorized

Kudingwa ogongode umkakhe

16 Nov, 2023 - 00:11 0 Views
Kudingwa ogongode umkakhe

uMthunywa

Thokozile Mbedzi

ZILOKHE zididekile izakhamizi zeChiredzi ngemva kokuba enye indoda igongonde unkosikazi wayo ngogodo wafa ngempelaviki.

Kubikwa uCephas Nduna oleminyaka engu-60 yokuzalwa utshaye unkosikazi wakhe uNomatter ngogodo ngemva kokungazwisisani enkulumeni wahle wafa.

Ekhuluma lentatheli kaMthunywa uNkosazana Claris Baloyi uthe behlelwe yisihluku esidanisayo esigabeni.

“Sibone into yamehlo silapha sididekile ingqondo, uNomatter wayesehlukane lomkakhe uCephas wayangakibo ngemva kokuxabana.

“UCephas esesele lonkosikazi wakhe omdala laye wayangakibo wamtshiya yedwa.

“Ekuxabaneni lomkakhe omdala esesele yedwa uCephas yikho acabanga khona ukuya koNomatter wafika wamcela ngesihle ukuthi aphenduke ekhaya, lakanye uNomatter wavuma babuyela emzini wabo.

“Ababili laba sebesemzini wabo baba lokuxabana bodwa akula muntu owabezwa bekhuluma ukuba babekhulumani kodwa sezwa ukuthi kukhona ukungezwani phakathi kwalaba ababili.

“Ekuxabaneni kwabo uCephas wacina edobha ugodo watshaya unkosikazi wakhe uNomatter kanye esiphaqeni esandleni sokunxele wahle wawela phansi.

“Esewele phansi wopha kakhulu, uCephas esenanzelela ukuthi wayemlimaze kakhulu wahle wabaleka etshiya unkosikazi wakhe elele echibini legazi.

“Umfowabo kaNomatter uGibson wathi efika wathola uNomatter esizwa ubuhlungu esopha kakhulu wasencedisana labanye bamthwalela esibhedlela kodwa ngokuswelakala kwenhlanhla wafela endleleni,” kulandisa uNkszn Baloyi.

Isikhulumi samapholisa esabelweni seMasvingo uAssistant Inspector Lorraine Ndlovu ebuzwa ngodaba lolu uvumile wathi solufikile ehofisini yabo.

“Udaba lwendoda etshaye unkosikazi wayo ngogodo wafa solufikile ehofisini yethu njalo amapholisa esefike lapho okwenzakale udaba lolu ahle athola udletshana lokuba uCephas ubaleke wayacatsha komzukulu wakhe esigabeni seMkuku ngakho amapholisa asalandela umkhondo wakhe njalo kusaphenyisiswa ngodaba lolu,” kuphetha uAsst Insp Ndlovu.

Share This:

Sponsored Links

Survey


We value your opinion! Take a moment to complete our survey

This will close in 20 seconds