uMthunywa
Listen Ndlovu
AMAPHOLISA akoBulawayo adinga ulwazi olungasiza ukuze kubotshwe indoda ehlasele yabulala intombi yayo elokitshini lePumula South andubana idliwe ngumswenya.
Umetheswacala, uThulani Lunga udingwa ngamapholisa mayelana lecala lokubulala ngesihluku intombi yakhe, uSilungile Tshalibe welokitshini lePumula South koBulawayo.
Kubikwa uThulani loSilungile babesidla amabele eMutamba Sports Bar mhlaka 11 Nhlangula lapho ababa lokungazwisisani basebephuma ebhawa.
Kubikwa baqonda kwenye indlu lapho esinye isakhamuzi esazama ukukhulumisana labo kodwa behluleka ukuxazulula inkinga yabo.
U-Assistant Commissioner Paul Nyathi
Umsolwa kubikwa wabonakala ngemva kwesikhatshana ephuma kuleyondlu ethwele ingqamu yemkulwini bathi besiyangena endlini bafica umzimba kaSilungile usuphakathi kwechibi legazi.
Isikhulumi samapholisa elizweni uAssistant Commissioner Paul Nyathi uthe bacela amalunga omphakathi angabe elolwazi olungasiza ekubotshweni kukaThulani Lunga. Abalolwazi bangasitshayela kunombolo zeHarare ezithi 0242-748836 loba ezakoBulawayo ezithi 0292-885479 kumbe ahambise umbiko kunombolo ezithi 0242-703631 kumbe ku-WhatsApp 0712 800197.
“Njengamapholisa sikhathazekile ngokwanda kwamacala okubulawa abangelwa yikungazwisisani kwabathandanayo. Amapholisa agcizelela njalo ukuba akula olelunga lokuthatha impilo yomunye ngoba iqakathekile, kumele ihlonitshwe. Umphakathi uxwayiswa ukuba ungasebenzisi udlame kodwa baxazulule inkinga ngokukhulumisana kuhle,” kutsho uNyathi.
