uMthunywa
Ethel Ncube
AMAPHOLISA eNkabanzwe adinga amadoda amathathu ababulala abantu eKwekwe kuwonalo umnyaka ukuze bayebhekana lengalo yomthetho.
Ometheswacala laba abadingwayo abasolelwa ukubulala babalisa uInnocent Maketo, Caswald Dzingira loNyasha Nyahuma. Kubikwa laba abathathu babulala abantu ababili ngoNkwenkwezi badliwa ngumswenya kuze kube lamuhla abakatholakali.
Kuvezwe ukuba ngenyanga kaNkwenkwezi umuyi uLovemore Marume wasuka lapho ahlala khona esiya eTuckshop.
Kwathi sokusebuku ometheswacala bahlangana loMarume bathi kalethe alakho wala watshaya isigelekeqe esisodwa sawela phansi okwenza abanye bakhona bazonda bagwaza uLovemore ngengqamu uthe esewile bamkhuthuza imali engange $50US, isikhwama semali, le-amplifier.
Ngesikhathi bemkhuthuza baphazanyiswa ngabanye omama bacina sebegwaze uChipo Gobiye wayabhubhela.
UMthunywa uxhumane lesikhulumi samapholisa eMidlands uInspector Emanuel Mahoko oveze ukuba badinga usizo lokuba babambe abathathu abasolelwa ekubulaleni.
“Sicela uzulu asincedise ngemininingwane engasincedisa ukuthola laba sibabophe uInnocent Maketo, Caswald Dzingirai loNyasha Nyahuma,” kuphetha uInsp Mahoko.
