uMthunywa
Ethel Ncube
IMULI yakoZulu eMberengwa idinga usizo kumphakathi ukuze ithole unina owanyamalala kunyanga ezine ezedluleyo kulandela ukugada ibhasi eyayivela koBulawayo, eMashura, eMberengwa esiya esiqintini seJani kodwa kazange ayefika lapho ayesiyakhona njalo lokhe engakaphenduki.
USilibaziso Zulu oleminyaka engu-61 wacina ukubonakala mhlaka 29 kuNcwabakazi ngomnyaka ka2022 kuze kube lamuhla.
Iphephandaba likazulu lixhumane lendodana kaZulu, uMnumzana Victor Zulu oveze ukuba bacela usizo ukuze bathole unina.
“Umama sacina ukumbona ngoNcwabakazi ngomnyaka ophelileyo. Kuze kube lamuhla siyamdinga asimboni. Wasuka ekhaya wagada ibhasi esiya kwesinye isigaba kazange aphinde abonakale.
“Sabuza abebhasi ayeyigadile bathi abananzelelanga ukuba wehlela ngaphi. Omunye umuntu wathi wambona eGwanda sesizamile ukumdinga kodwa asimtholi. Ngelanga acatsha ngalo wayegqoke ijazi elimnyama njalo ngalelolanga ngathola ama-missed calls okutshengisa ukuthi wayeke wazama ukungifonela kodwa ngathi sengizama ukumfonela inombolo zakhe zala ukungena,” kubika uMnu Zulu.
Uqhubekele phambili eveza ukuba babika emapholiseni ngodaba lolu.
“Sahamba sayabika emapholiseni ukuba sicatshelwe ngumama siyamdinga asimboni asikatholi mbiko. Sicela ongabe wambona kumbe okwaziyo lapho akhona asithinte kunombolo ezilandelayo, 0773875896, 0774579641, 0782135321,” kuphetha uMnu Zulu.
