uMthunywa
INDUNA yesigabeni seSilobela eNkabazwe yelizwe, uMalisa isiveze ukukhathazeka ngokusilela kolwazi emaphandleni ngesifo se-Covid-19 okulakho ukubangela ukumemetheka kwawo.
Ikhuluma loMthunywa ecingeni induna uMalisa iveze ukuthi abantu abangaphansi kwayo kukhanya lokhu bengazwisisi ngokuthi igcikwane le-corona limemetheka njani kanye lokuthi liyabulala.
“Senginanzelele ukuthi abantu abanengi lanxa bekhuluma bama eduze duze njalo lokhu bexhawulana okuveza ukuba ulwazi ngegcikwane le-corona lulokhu lusilela kakhulu lapha emaphandleni.
“Ngikhuluma nje ngithole abafana ngaphansi kwesihlahla behlezi bebanengi betshova amakhasi benjalo abalampahla abayigqokileyo eyokuzivikela njalo lamakhadi lawo abadlala ngawo abanjwa ngezandla ezingagezwanga,” kulandisa induna uMalisa.
Uqhubekele phambili eveza ukuba kusadingeka ukuba ulwazi lusabalaliswe ngendlela ezitshiyeneyo.
“Kusadingeka ukuba kwabiwe ulwazi ngendlela ezehlukeneyo ukuze abantu bonke bafinyelelwe njalo bafunde ukuthi isifo lesi simemetheka njani lokuthi abantu bangazivikela njani kuso.
“Ugatsha olubona ngezempilakahle lungenza njalo amaphetshana afundisa ngesifo lesi angasabalaliswa emphakathini ngoba kunzima ukulwisa ukumemetheka kwawo abantu besemnyameni. Amaphepha la anganamathiselwa njalo ezihlahleni, loba duzane lezibholane ukuze uzulu wonke azibalele,” kuchaza induna uMalisa.
Induna uMalisa iqhubekele phambili iveza ukuba emaphandleni kuyadingeka njalo ukuba kutholakale impahla yokusebenzisa yokuvikela i-corona.
“Abantu emaphandleni kabalayo impahla yokuvikela ukumemetheka kwegcikwane le-corona efana lesepa lokunye. Singajabula kakhulu nxa singathola usizo lwempahla le ukuze sinike abantu.
Induna uDobola weBinga ugcizelele wathi njengabaphathi bomdabu bayazama ukufundisa izakhamizi zabo ngomkhuhlane lo osukhona.
“Ngiyazama ukuba ngisabalalise ulwazi ngomkhuhlane weCorona lokuthi umemetheka njani ngoba abanengi lokhu bengelalo ulwazi ngawo.
Uqhubekele phambili esithi loba uHulumende ethe abantu bahlale emakhaya bangahambi ukuze kwenqatshelwe ukumemetheka kweCorona uxwayise izakhamizi zakhe ukuthi zihlalisane ngokuthula zingalwi njalo nxa sekuthe kwaba lohlupho zingathandabuzi ukutshaya ucingo loba ukuyafika kuyo ukuze kungonakali okunengi.
