uMthunywa
Ethel Ncube
KULEZIMBAMGODI ezimbili ezidilikelwe yimigodi eGwanda ngesikhathi zisebenza ngaphansi komgodi ngempelaviki.
ULenin Nyoni obeleminyaka yokuzalwa engu-42 udilikelwe ngumgodi ngesikhathi esebenza eBolo Mine ngoLwesihlanu kukanti uCleopas Ndlovu oleminyaka engu-32 uwelwe lilitshe laye esimba eBina Mine ngoMgqibelo.
Imigodi le kubikwa iseduze duze.
Intatheli ixhumane lomunye wabahlali bakule indawo uMnumzana Dennis Sibanda oveze ukuba lingozi yenzakala.
“Umuyi uNyoni wadilikelwa ngumgodi ephansi kodwa wathola usizo masinyane wakhutshwa esaphila, uthe esendleleni yokuya esibhedlela ngokuswelakala kwenhlanhla wedlula emhlabeni,” kubika uMnu Ndlovu.
Omele isikhulumi samapholisa esabelweni seMatabeleland South uAssistant Inspector Thabani Mkhwananzi uthe bamukele imibiko yezimbamgodi ezedlule emhlabeni ngesikhathi zisemsebenzini.
“Samukele imibiko embili lapho okwedlule khona izimbamgodi ezimbili. Omunye watshaywa lilitshe engaphansi komgodi bamkhipha kodwa wedlula engakafiki esibhedlela kukanti omunye udilikelwe ngumgodi wahle wafela phakathi.
“Ngithanda ukuxwayisa uzulu ukuthi axekane lomkhuba wokuyasebenza emigodini okungasagejwa khona ngoba kuyabe kulezizatho ezenza kungasembiwa kiyo.
“Sithanda ukuxwayisa uzulu ukuthi angangeni emgodini ungazange uhlolwe ngabogatsha olubona ngezokwembiwa kanye labe Environmental Management Agency (Ema),” kuphetha uAsst Insp Mkhwananzi.
