uMthunywa
Intatheli kaMthunywa
IQEMBU leHighlanders lizadibana lengqwele zebhola le-South Africa iOrlando Pirates kumdlalo ozaqoqwa kuthakazelelwa ukufikisa iminyaka elitshumi lane kaZibuse ngoMabasa.
Kubikwa umdlalo lo ozabe usenkundleni yeBarbourfields, uqoqwa lugatsha lukaHulumende olwezemidlalo kulandela ukuphawulwa kombiko wokuthi lonyaka usuku lukaZibuse luthathazelelwa koNtuthu.
Ekhuluma lentatheli ngemva komhlangano wamabhizimusi abona ngezokwethekelelwa kwelizwe koBulawayo, uBenson Dube umqondisi omkhulu kugatsha lwezemidlalo uthe kusenhlelweni zabo ukunxusa i-Orlando Pirates.
“Njengoba isizwe sizathakazelela iminyaka engu-40, siphezulu kokuthi sihlanganise umdlalo phakathi kwe-Highlanders leOrlando Pirates. Silungiselele ukuthi sithuthe ezemidlalo zenziwe koBulawayo lakwezinye indawo izwe lonke.”
Lo ngumdlalo olakho ukugcwalisa inkundla yeBarbourfields njengoba amaqembu womabili elosekelo olukhulu.
Kuzakhanya ukuthi kungani inengi labalandeli bebhola kulumhlubulo welizwe bewathanda amaqembu la ukwedlula wonke.
Akubizwa ozwayo njalo akula ongaziyo ukuthi kusukela kuzitanda zeSoweto kulinkundla kuze kuyebamba laseMpankweni kubhode lakuVIP kuzabe kumnyama tshu kugqokwe izikipa zombala omnyama lomhlophe.
Sebekubeke sobala abalandeli benguqu koBulawayo, ikakhulu abeHighlanders ukuthi bazagcwalisa inkundla yabo bejonge ukusekela ekaMatshobane loba nje beyithanda futhi iBhakaniya.
I-Orlando Pirates icine ukuza koBulawayo ngo-2019 kuZibandlela mhla idibana leFC Platimum kumdlalo weCaf Champions League.
Ngokuzwa ngokuqoqwa kwalumdlalo, abanye abasekeli beHighlanders koBulawayo bathe iPirates “ingumfowabo” weHighlanders ngakho kuzakuba ngumdlalo wokukholisa nje.
Kuvele ukuthi bambalwa abavuma ukuthi bazabukela lumdlalo befuna ukuthi kunqobe izivakatshi zeMzansi.
“Izaphenduka ibemnyama inkundla yeBarbourfields ngoba silande ukubabukela abafowethu iOrlando Pirates. Asikhethi qembu lapha, kodwa yimvelo ukuthi umuntu ozazi esekela iBosso, usekela leOrlando Pirates.
“Kuzabamnandi la. Nxa laba abaqoqa lumdlalo beqinisile, kutsho ukuba sizakholisa ngoZibuse.
Kodwa leli liqembu esilazi ukwedlula wonke. Angeke kumangalise ukuthola ukuthi abanye bethu abadlali beBhakaniya sibazi ngcono ukwedlula abakuleli,” kutsho uXolani Ncube umsekeli weHighlanders koBulawayo.
Umsekeli weHighlanders olodumo ezitaladeni zakoNtuthu obizwa ngokuthi nguTeekay yena uzabukela ukuthi ajabule ngoba amathimu womabili “ayabahlanyisa”.
“Lapha sikhuluma ngamaqembu amabili asenhliziyweni yami. Ngiwathanda kakhulu. Ngizangena enkundleni ukuthi ngiyejabulela uZibuse. Umdlalo lo uzakubamnandi kakhulu.”
