uMthunywa
ASIKHO isizatho sokutshintsha unozinti kuKaizer Chiefs njengoba kuza umdlalo omkhulu odibanisa inkunzi zeSoweto ngempelaviki.
Le yindlela ebonwa yingcitshi yabonozinti uPatson “Sparks” Banda owayebamba ku-Orlando Pirates eminyakeni edluleyo. Umdlalo lo ngoweligi njalo uzaphuma kumabonakude ngehola lesithathu emini, usenkundleni yeFNB.
UBanda ukhuluma kanje ngoba kuyindaba esegudwini eyokuxega kwemvimbi kuqembu leChiefs ngemva kwamaphutha amabi asenziwe ngunozinti uVirgil Vries.
UVries unikezwe ithuba lokuhlala egedini kuMakhosi ngenxa yokulimala kukanozinti, u-Itumeleng Khune, ongeke esadlala kulisizini, ngokutsho kukadokotela weqembu.
Kodwa uVries usephenduke ihlaya kuzitha zeziMpofana njengoba “esebhave” ngebhola kwaze kwaba kabili, okungamaphutha alahlekisele ezakhe imiklomelo emithathu zidlala leMamelodi Sundowns leCape Town City.
Umqeqetshi weChiefs, u-Ernest Middendorp, ucine ephumele obala ngokuthi amaphutha kanozinti lo asobala ngendlela eyenza kube nzima ukumvikela.
Ngesonto eledlule kube sekumenyezelwa uDaniel Akpeyi obekuChippa United njengozobangisa uVries ijesi.
Omunye unozinti ongakasetshenziswa kuChiefs nguBruce Bvuma.
USparks akaboni kungumqondo omuhle ukutshintsha unozinti.
“Kukhona la engike ngibize khona unozinti ngesaka kodwa cha uVries uyadlala yena bese enza amaphutha anzima. Ngoba bona bayamazi, yini abayenzayo ukumvikela?
“Mangaki amabhola abawatshayayo ukuze kuthi noma esenza amaphutha la engabalimazi? Asikho isidingo sokumtshintsha ngoba abakwazi ubuthaka balo omutsha lokuthi uqine ngaphi. Lowo bayazi vele uzohlohlwa. Kumele batshaye amabhola,” kutsho uBanda.
Uthe layo iPirates ayikho msulwa emuva. Leliqembu lilokhu litshintsha onozinti emva njengoba ngempelasonto kuvimbe uWayne Sandilands bedlala le-Esperance koweCAF Champions League.
USandilands laye uke waba sematheni ngokwenza iphutha elibi bedlala leHighlands Park koweligi.
Abanye onozinti kuPirates, uSiyabonga Mpontshane loJackson Mabokgwane, labo elibuye libeqe ijesi kanti kukhona loBrilliant Khuzwayo ongakavimbi.
“Umehluko nje okhona yikuthi iPirates ngokomdlalo ingaphezulu kuleChiefs okwamanje. Into okumele onozinti bayazi yikuthi uma sekusenkundleni yibo abaqeqetshi, okumele batshele udonga lwabo ukuthi kumele luhleleke njani. Kufanele bakhulume. Lami ngangiwenza amaphutha kodwa ozakwethu babengithethisa. Ngangingacini ngokubanga lezitha kodwa ngangibangisana labo ekutheni uma belitshaya ibhola, kumele ngiqinisekise ukuthi kimi alingeni,” kutsho uBanda.
— Ubulembu
