uMthunywa
YiNtatheli kaMthunywa
SEKUMNANDI kumbango ka-Division One emhlubulweni ongezansi yelizwe nanko phela sekukhulunywa ngamaqembu amabili kuphela iTalen Vision leBulawayo City.
Zombili zidibene ngoLwesihlanu lapho okuphele Amakhosi ebusa nge 1-0 enkundleni yeLuveve. Ukunqoba kweqembu lekhansili kutshiye iTalen Vision ilokhe iphezulu ikhokhela ngemiklomelo emithathu iku-52. IBulawayo Chiefs iyalandela ngemiklomelo engu-49.
Kumaqembu la, inkezo ayikacaci ngoba akwaziwa ukuthi imidlalo elandelayo izakuba njani.
Kodwa, iqembu le-Talen Vision alikufihli ukuba ukuphumelela kwalo ukuqansa lisiya esiqongweni seligi ka-Division One kuvula indlela yokuthi lithwale inkezo yeligi le kulisizini.
Sekudlule amasizini amathathu iTalen Vision isalela muva, isehluleka ekucineni kwesizini ngesikhathi ikhangelelwe ukuthi inqobe iye kuligi ephakemeyo iPSL.
Ukuma esiqongweni akumangalisi umqeqetshi uMkhuphali Masuku obike ukuba uhambo lokuyanqoba iligi lusakhona.
“Lapha phela kulomjaho. Umncintiswano usakhona ngoba ukukhokhela ilogu akutsho ukuba sesizintshantshu.
“Kuzamele sibambelele ngamandla lapho, okutsho ukuba kumele sisebenze, sidlale umdlalo ozaletha amabhola emambuleni. Inhloso yethu njengeqembu leTalen Vision yikuthi siphethe isizini le sidlale okungcono kulesizini edluleyo,” kutsho uMasuku.