Kucelwa ezinyaweni eLuveve High

10 Jan, 2019 - 00:01 0 Views
Kucelwa  ezinyaweni eLuveve High

uMthunywa

YiNtatheli kaMthunywa

INHLANGANISO yeBulawayo Athletics Board (Bab) isiphiwe ithuba lokuqoqa imincintiswano yemijaho emide yalonyaka njalo kulandela ukuqhuba kuhle umbuthano womnyaka odluleyo enkundleni zesikolo seLuveve High.

Intshantshu zesiqubu zidibana ngoMgqibelo kubangwa ozatshaya intambo phambili kwabanye kumango ebalisa amakhilomitha amabili lengxenye kwabasakhualyo, i8km le10km ezagijinywa ngabadala. Imincintiswano le ngeyakuqala kuluhlu lwenhlanganiso le kanye lakukhalenda yomdlalo wokugijima ngaphansi kwenhlanganiso enkulu eyeNational Athletics Association of Zimbabwe (Naaz).

Ekhuluma lephephandaba likazulu ngoLwesibili, umgcinisihlalo weBab uManuel Mpofu uthe ukuncintisa kuzabe kubiza intengo ephansi kakhulu.

“Sinxusa wonke umuntu ikakhulu amakilabhu lezikolo. Lonyaka umncintiswano wethu wemango emide uzaqhutshwa futhi eLuveve High School koBulawayo. Njengenhlanganiso ephethe ezokugijima kulelidolobho, kungumthwalo wethu ukuba sibone ukuthi konke kuzaqhutshwa kuhle. 

“Kuzakuba lama-relay azancintisela i-8km. Kumango ofanayo kuzagijima elinye ihlandla labasakhulayo. Umango omude owe-10km uzancintiswa yilabo asebekhulile. Ukuphatheka emncintiswaneni yimahala kulabo abangaphansi kwezabelo. Sifuna idola elilodwa nje ebantwaneni, lamabili kuphela ebadaleni). Lo ngumncintiswano womuntu wonke ngakho izakhamizi zakoBulawayo ziyacelwa ukuthi ziphatheke zibuye ngobunengi bazo,” kutsho uMpofu.

Kungumbono kaMpofu ukuba ukuvulwa kwesizini yokugijima kuzavulela abasakhulayo ithuba lokuthi bayencintisa kuhle kumbuthano yezikolo ezaqalisa kumaviki amathathu alandelayo.

Uthe abadala abazaphatheka kumjaho ngoMgqibelo balakho ukuthi balungiselele imincintiswano ezalandela phakathi komnyaka, ikakhulu le elemvuzo yemali eziphezulu.

“NgoMgqibelo kufana lokuthi sivula inkundla zesizini ka-2019. Uluhlu lwemincintiswano yethu selukhitshiwe ngakho kubalulekile ukuthi abagijima ngokuzimisela bahlolisise ukuthi imijaho ihlelwe njani. Ukulungiselela kuqakathekile.”

Ngaphandle kwalumncintiswano, iNaaz izaphinda iqoqe eminye ngenyanga kaMabasa incedisana lezinye inhlanganiso lamankampani. Kumijaho le kulowe- ZITF Coca-Cola Four-Minute mile lowe-Old Mutual Nkulumane Marathon.

Uluhlu lwemincintiswano olukhitshwe yiNaaz luveza ukuthi kuzagijinywa umnyaka uze uyephela.

Share This:

Sponsored Links