Nkosilathi Sibanda
Iqembu le-netball lesikolo seMabhikwa High School litshengisele ukuthi liyazi elikwenzayo emdlalweni lo ngokuba zintshantshu kumncintiswano we-Under 20 National Association of Secondary School Heads (Nash) esabelweni seMatabeleland North.
Ngokunqoba esikwenzileyo, isikolo lesi sizamela isabelo seMatabeleland North kumncintiswano wezabelo ozaqhutshelwa eManicaland mhlaka 26 kusiya ku28 Nhlangula.
Isikolo lesi, esiseLupane, sitshengise ukuthi silakho ukuphatheka kunkundla zaphezulu kumdlalo we-netball ezikolo ngokunqoba yonke imidlalo yaso eMarist Brothers esiqintini seHwange ngeviki edluleyo. Isikolo lesi, esiqeqetshwa nguSimiso Dube, sihlohle amabhola amanengi njalo kasizange sinqotshwe lakumdlalo owodwa.
Emdlalweni wabo wokuqala iMabhikwa itshaye iMarist nge 35-2 yadlulela phambili yathela othulini iSomvubu nge 36-2. Iqhubeke yanqoba iHwange nge 24-10. I-Tsholotsho ilandele, yaguqa nge 26-19. Kumdlalo leMosi oa Tunya iMabhikwa inqobe nge 26-24.
Ukunqoba lokhu kutshiye abadlali labaqeqetshi babo begcwele injabulo, okuvuselele ithemba kubafundi bakulesikolo, ngokutsho komsekeli womqondisi wezemidlalo eMabhikwa High School uJonathan Moyo.
“Sihambe eMarist siliqembu eliqinileyo. Okwenze ukunqoba kwethu kwaba mnandi yikuthi siqede singatshaywanga. Lawa mantombazana enze kuhle njalo konke kwakungenxa yesimiso yokuqeqetshwa kanzima.
“Abaqeqetshi bebekwazi okufanele bakwenze. Baqeqetshe amantombazana la ukuthi aqhubeke ngokudlala lentshantshu zakwezinye izabelo. Besingathanda ukubona abadlali bethu bekhethwa eqenjini lesizwe. Siyaziqhenya ngabo,” kutsho uMoyo.
UMoyo uthe loba bonke abadlali benze kuhle, bakhona abahambe phambili kumncintiswano ababalisa umgadli uPurity Nyoni, uMongiwa Moyo odlala engumgadli loThandeka Moyo.
