Langelihle Moyo
AMAPHOLISA aphezu kokuphenya amacala amabili okubalala enzakele endaweni ezimbili ezehlukeneyo esabelweni se-Midlands endaweni yeGokwe laseVunguwana eGweru.
Kubikwa kusehlakalo sakuqala esenzakale eGweru mhlaka 6 kuyonale inyanga ngehola lesitshiyagalombili umuyi, uRoy Mbiba watshaywa kakhulu ngabetheswacala abane ngemva kokuba efike wavusa umsindo lo Godfrey Ncube oleminyaka yokuzalwa engu-34 lo Headman Moyo beVungwana North eGweru esithi bake bambophisa besithi wenze okungekho emthethweni.
Umuyi wahle weqela uGodfrey Ncube wamhlasela emlenzeni ngensimbi (iron rod) wabaleka.
Abasolwa abane abayibo abacina bebulala umuyi uVusumuzi Nkomo 41, Zwelani Nkomo 37, Khulumani Ncube 34 lo Tichaona Sibanda oweVungwana South eGweru bagijimisa uMbiba bambamba bamtshaya konke lokumkhahlela ngezicathulo, umuyi wasala elamanxeba engasekho esimeni esihle wagijinyiselwa esibhedlela se Gweru General Hospital, wafika wedluliselwa esibhedlela seMpilo koBulawayo okuyikho lapha afika wabhubha khona.
Abasolwa abathathu sebabotshwa ngaphandle kuka Tichaona osadingwa ngamapholisa.
Kesehlakalo sesibili esanzakale mhlaka 8 kuyonale inyanga endaweni yeGokwe uSimon Matura oleminyaka yokuzalwa engu-22 weGwedu ngaphansi kwenduna uNemangwe, eGokwe wagwazwa walimala ngemva kokuba kube lokungazwani phakathi kwakhe lomunye owayezama ukumhlasela.
Intatheli kaMthunywa izwe kuthiwa umuyi waba lengxabano lo Willard Matashu lo Thabisani Matashu abahlala eNdhlalambi ngaphansi kwenduna uNemangwe eGokwe South. Kubikwa laba ababili bakhipha ingqamu bagwaza umuyi esifubeni lasesiswini bamtshiya ethe dacalala esizibeni segazi okwabangela ukuthi abhubhe.
Isikhulumi samapholisa esabelweni seMidland uInspector Emmanuel Mahoko uthe amapholisa afika athatha isidumbu asisa esibhedlela seGokwe ukuze siyehlolwa.
Ubuye waxwayisa uzulu ukuthi atshiyane lodlame.
“Njengamapholisa sithanda ukuxwayisa uzulu ukuthi atshiyane lodlame njalo angafaki umthetho ezandleni zakhe. Sicela njalo abazezwa umkhondo wabasolwa abathathu uTichaona Sibanda, Willard Matashu lo Thabisani Matashu azise amapholisa aseduzane laye,” kuphetha uInsp Mahoko.
