uMthunywa
KUBOTSHWE umfundi ongumakhelwane lomuntu ongumsolwa ngokubulawa kukatitsha eKuvukeni, eMnambithi kweleSouth Africa.
UMnumzana Mkhumbuzeni Isaac Mbongwa (43) obefundisa esikolo seMabhekazi High utholwe esikwe ugqogqogqo endlini yakhe ngoLwesihlanu, ntambama.
Umfundi ongumakhelwane okuthiwa ubanjwe nguninakhulu ukuthi kukhona okungalungile abekwenza, kuthiwa uqhutshwe nguninakhulu wamusa esiteshini samapholisa ngemva kokuvuma ukuthi ubulele utitsha.
Lumfundi (18) okuthiwa ubefunda KwaNongoma ubotshwe lomunye wesilisa oleminyaka engu-22 ngoMgqibelo.
Udadewabo kamufi, uNkosikazi Jabulile Mbongwa-Molefe, uthe ngokuthola kwabo, abasolwa bebenatha laye umfowabo ngalelolanga.
Bathe uma besehlukana kwezwakala abasolwa besithi basayogqoka izingubo zokusebenza ngoba bayasebenza.
“Abebenatha labo abaqondanga ukuthi bakhuluma ngani. Sizwa kuthiwa bebebane ngesikhathi behlasela umfowethu.
Inhloso yabo kuthiwa bekuyikufuna imota umfowethu abeyibolekwe yinkampani yomshuwalense ngoba eyakhe kade itshayelele.
Ngicabanga ukuthi bazitshele ukuthi ulemota entsha. Ibuhlungu into abayenzileyo, sebengaze bambulale kabuhlungu kanje umfowethu, bamqume okwembuzi ngenxa yemota?” kubalisa uNkkz Mbongwa-Molefe.
Imota ebeyebiwe emzini kamufi kuthiwa itholwe itshisiwe.
Ngemva kokuzwakala kwezindaba zokuthi abasolwa babotshelwe ukubulala utitsha, imizi yasemakubo kuthiwa ithungelwe ngomlilo ngamalunga omphakathi asendaweni.
Kusolwa ukuthi bebebane abantu abahlasele umufi.
“Ngokuthola kwethu imota ibanike inkinga abasolwa, babona ukuthi izinsalela zeminwe zizobaceba, bayitshisa kanti omunye wabasolwa uzobanjwa ugogo wakhe.
Kubuhlungu okwenzakeleyo ngoba sekutshiswe lemizi yabantu abadala abebengazithumanga izingane ukuthi ziyobulala.
Laba bafana abakaze baxabane lomfowethu futhi akukho abakubange laye.
Asazi ukuthi ngobani laba ababehamba labo ababili ngoba ababatsho njengoba kusolwa ukuthi bebebane,” kutsho uNkkz Mbongwa-Molefe.
ULt Col Thulani Zwane uthe kubotshwe abesilisa ababili oleminyaka engu-18 ongumfundi loleminyaka engu-22 ngecala lokubulala lelokweba.
Uthe kulindeleke ukuthi bavele emthethwandaba.
UMnumzana Kwazi Mthethwa okhulumela uMnyango wezeMfundo, uthe bazwelana lomdeni ngokuwehleleyo. — Ubulembu
