uMthunywa
Thokozile Mbedzi
ZISELE zikhakhamele izakhamizi kanye labongikazi bekilinika yeNtabazinduna bucwadlana ledolobho lakoBulawayo kulandela ukuzwa ngesehlakalo selinye inina lePumula South koBulawayo elitshontshele elinye usane obelusanda kukhitshwa esibhedlela seMpilo.
UAnita Khumalo oleminyaka engu-38 yokuzalwa mhlaka 10 Mpandula wayesesibhedlela seMpilo Martenity lapho athola amanina amabili ayelindele ukukhitshwa esibhedlela wasesithi uzawancedisa.
Kuvele ukuba uKhumalo wabancedisa baphuma esibhedlela wadinga imota baya eRenkini omunye wafika wasala kukanti lo owayesiya eNyamandlovu walayelwa ukuthi ayedinga imota eziyakibo ku3rd Avenue lapho umetheswacala asala emile unina wosane wayadinga izimota.
Kubikwa ekuphendukeni wathi ethi mehlo suka wathola uKhumalo esetshaye utshani lomntwana okwenza wayabikela amapholisa.
Isikhulumi samapholisa ulnspector Abednico Ncube uthe amapholisa abophe inina elintshontshele elinye usana ngeSonto besuka esibhedlela seMpilo.
“Sibophe uAnita Khumalo owafika esibhedlela seMpilo ngesikhathi inina leNyamandlovu likhutshwa esibhedlela ngemva kokukhululeka umntwana ongumfana.
Kubikwa ngosuku olulandelayo mhlaka 11 Mpandula umetheswacala wavakatshela kibo ekhaya eNtabazinduna lapho afika koyisekazi wasembuza ngokuthi umntanakhe mkhulu okunganani kodwa yena wakhanya engakuqondisisi ukuba umntwana unganani wasemqhuba ikhadi lomntwana wafica kubhalwe ibizo elingasi lakhe wahle wathi kabaye ekilinika ukuze bayemncedisa njengoba ibizo lingasi lakhe elisekhadini.
Omongikazi basebebuzisisa bathola ukuba kutshotshwe umntwana njalo lebizo ngelikamama weNyamandlovu kwahle kwabikelwa amapholisa uKhumalo wabotshwa.
“Amapholisa axwayisa uzulu ukuba bengabothemba abantu abangabaziyo baze babanike abantwana ngoba kuyingozi. Lokhu kayisikokuqala ukuthi sithole umbiko ofana lalowu.
“Amapholisa athanda ukubonga ubabakazi ngokunanzelela lokuhambisa udaba esibhedlela okucine kuncedisa ukuba umsolwa afinyelelwe yingalo yomthetho njalo uzamiswa emthethwandaba ensukwini ezimbalwa ezizayo.”
