uMthunywa
Thokozile Mbedzi
KULAMASELA amahlanu avela eGokwe okubikwa abehamba ngomtshova abanjwe xhaka ebuthelele imbuzi ezingu-47 abezitshontshe esigabeni seSinansengwe eBinga.
Amasela la, abesifazana ababili kanye lamadoda amathathu okungasatholakalanga amabizo awo, asuka esigabeni seSimutembu khonale eGokwe babanjwe kuviki ephelileyo.
Kuzwakale ukuthi amasela la abeselomkhuba wakutshayela umtshova ayetshontsha imbuzi eBinga ngobusuku abuyele kibo.
Ekhuluma lentatheli kaMthunywa uMnumzana Joel Mudimba uthe besebethwele nzima ngokutshontshelwa imbuzi zabo belele.
“Sesikhathele ngamasela abuya lapha etshontsha imbuzi esigabeni sethu ebusuku abantu belele. Aqala atshontsha ezingu-27 ngenyanga ephelileyo kuyonale iviki ephelileyo aphinda njalo atshontsha ezingu-20.
“Kwezingu-20 lezi ezingu-7 bekungezikaNkosazana Regina Mudenda yena ohle wawezwa amasela la, wagijima wayabikela induna uSinansengwe yona ehle yaphanga yafonela amapholisa ahle abamelela emgwaqweni awabamba esebuyela kibo,” kutsho uMnu Mudimba.
Uqhubekele phambili wathi kuyadanisa ukuba abesifazana labo sebephatheka ekutshontsheni izifuyo.
“Kuyisimanga esikhulu kithi ukuba omama balale behamba besiyatshontsha izifuyo zabantu.
UKhansila wakulindawo uElimon Mudenda ebuzwa ngodaba lolu uvumile wathi lwenzakele.
“Beseziphelile imbuzi esigabeni sethu, njalo okubi yikuthi bebethi nxa bengena esibayeni somuntu bathathe bangatshiyi lutho.
“Ukuze babanjwe sancedwa yisibindi sikaNkszn Regina yena owathi esebazwile wayabikela induna yahle yazisa amapholisa.
“Sibonga kakhulu ukuzimisela kwamapholisa ekubanjweni kwamasela la ngoba ahle ayawacathamela awabamba,” kulandisa uKhansila Mudenda.
Induna uTimothy Sinansengwe ebuzwa ngodaba lolu uthe uzakhulumisana labantu bakhe ukuze baqaphele abantu abangayisibo besigabeni.
“Ukutshontshwa kwembuzi zize zibe ngu-47 kubangelwa yikwamukelwa kwabantu abangasi balapha. Kungakho ngizakhulumisana lezakhamizi ukuze nxa kungabonakala umuntu ongasi walapha ehambahamba ebusuku abanjwe njalo abuzisiswe ukuthi ufunani lapho,” kuchaza induna uSinansengwe.
