Bhekimpilo Tshalibe
KULAMASELA amathathu enkomo abesehluphile eGweru abanjwe ngamapholisa e-Anti-Stock Theft kanye labacuphi elenkomo etshontshiweyo.
Kubikwa onguye obekhokhela amasela la, ubesanda kuphuma ejele ngecala lokutshontsha inkomo.
Isikhulumi samapholisa eNkabazwe uInspector Emmanuel Mahoko uthe ukusebenzisana kwamapholisa kuncedise kakhulu ekubotshweni kwabathathu laba akade sebehluphile ngokutshontsha inkomo.
Inspector Emmanuel Mahoko
Uthe amasela la wonke ngaweZvishavane abalisa Enock Mpofu owaziwa futhi ngokuthi nguJona (32) we Eastlea, uChrispen Matondo Zikhali (40), we-Isaiah Park kunye loTanaka Murereka (24) weCouncil Park.
“Amasela la abotshwe kulandela isehlakalo esenzakala mhlaka 21 Zibandlela lapho abadinga khona imota yokuthwala inyama yenkomo etshontshiweyo.
Kubikwa amapholisa asola imota yohlobo lwe-Toyota Probox ize iqhatshwe ngenye indoda isuka eZvishavane isiya eGweru. Kuzwakale ukuthi besuka eGweru bahamba ngomgwaqo weGweru-Mvuma ebusuku. Besendleleni endaweni zeLalapanzi, umtshayeli wemota wamangala esebona abathathu laba sebegijimisa inkomo ezaziseceleni kwendlela befuna ukuzibamba.
Kubikwa benelisa ukubamba inkomo eyodwa bayihlinzela kweyinye indawo eduze lejele yeWhawha basebethwala inyama bafuna ukuyayitshiya kweyinye indlu eselokitshini leMkoba, eGweru.
Kuzwakale ukuthi umtshayeli wemota esebona inyama isiwa endlini waqala ukuxabana lamadoda la ngoba engazwisisi indlela ababemchasisela ngayo okwabangela ukuthi atshibilike abuyele emuva eZvishavane.
Kubikwa amapholisa ekuchwayisiseni alandelela icala enelisa ukubopha uMpofu eMandava, eZvishavane. Kukanti uZikhali loMurereka babotshelwa eTop-Ten shops eMkoba 5, eGweru.
Amapholisa adinga omunye umetheswacala uBongani Ncube.
U-Insp Mahoko uveze ukuthi benelisa ukuyahlolisisa ezindlini eziseMkoba bathola inyama eyi-50kg, inhloko kunye lezikhali ezazisetshenziswa ukuhlinza ezigoqela ihloka, ingqamu kunye lemichilo. Umnikazi wenkomo wabonakala.
