uMthunywa
Thokozile Mbedzi
ZIZAKE zibethwe ngumoya okwesikhatshana izakhamizi zakoBulawayo kulandela ukubotshwa kwamadoda ayisificaminwe mibili abesehluphile ngokuhlasela lokubulala abantu ngamabhemba.
Izigelekeqe lezi zikhalelwe ngamasongo kasigonyela mhlaka 12 kuyonale inyanga ngemva kokuhlukuluza abantu emalokitshini atshiyeneyo edolobheni lakoBulawayo kusukela ngenyanga kaMabasa.
Isikhulumi samapholisa koBulawayo uInspector Abednico Ncube uthe amapholisa abophe uSelby Nkala oleminyaka engu-38 weMagwegwe, uReason Gumede oleminyaka engu-33 oweNketa 9, uPrince Ndlovu oleminyaka engu-24 we-Old Lobengula, uAtkins Mandizha (24) we-Old Lobengula, uDerrick Ndlovu oleminyaka engu-24 ohlala e-Old Lobengula, uKasimio Mazwiamahle Ngwenya oleminyaka engu34 weMganwini, uCalvin Njabulo oleminyaka engu-30 wePumula South, loNgonidzashe Manyaya oleminyaka engu-34 weNkulumane kulandela ukuthola udletshana oluvela kuzulu.
Kulandela ukubotshwa kwezigebenga lezi kutholakale impahla ebiza iUS$100 000 egoqela omabonakude, ama-solar batteries, ama-battery ezimota, omaqandisa, izitofu zegazi lamatanka akhona, izimota ezimbili kunye lezipikha zamarediyo.
Kubikwa izigebengu lezi njengoba bezizinengi bezisehlukana phakathi zibe ngamaqembu amabili loba, uPrince Ndlovu ubengena kumaqembu womabili okutshengisa ukuthi ubengumkhokheli wabo.
Kutholakale njalo lemibhobho emithathu, amabhemba, izingqamu, amasaha, inkemba kunye lenduku akade bekusebenzisa ngesikhathi behlasela abantu.
uInspector Abednico Ncube
“Njengamapholisa sinanzelele ukuba izibotshwa zonke ngezakoBulawayo. Okusisize ukuthi sibophe izigelekeqe lezi eziyisificaminwe mibili loba kusele ezinye ezinhlanu yikuba saba lomkhankaso sicela uzulu ukuba asebenzisane lathi okwenze amapholisa ethu eCID Homicide enelise ukuthola imbiko yokuba benelise ukubopha izigebenga lezi.
“Siyabonga uzulu ngokusipha imbiko ephathise ukuthi kubotshwe izigebenga lezi,” kulandisa uInsp Ncube.
