uMthunywa
Listen Ndlovu
AMAPHOLISA esabelweni seMidlands asebophe amadoda amabili kulandela ukutholakala kwesidumbu sendoda eleminyaka engu-39 egangeni.
UMunashe Mpofu (18) loChahiya Makore (23) babotshwe ngecala lokubulala uJohn Gomba egangeni eliseduzane leCompound 2 Mine eKwekwe.
Kubikwa isidumbu sikaGomba sitholakale silamanxeba okugwazwa njalo amathumbu abesegcekeni.
Isikhulumi samapholisa eMidlands uInspector Emmanuel Mahoko uthe amapholisa alokhu esachwayisisa ngendaba le.
“Ukuchwayisisa kwamapholisa sekwenze kwabotshwa amadoda amabili athi uMunashe Mpofu kunye loChahiya Makore njalo balokhu bephathisa ekuphenyweni kwendaba le.
“Amapholisa afisa njalo ukubuzisisa amadoda amathathu asendaweni ye Alarm 2 Mine Compound mayelana lokubulawa kukaJohn Gomba, athi uIsaac Gomba Mpande, Clever Zananda kanye lo Irvene Mawodzeka,” kutsho uInsp Mahoko.
Uphethe ngokucela labo abangabe belolwazi lokuthi abathathu laba bangaphi ukuthi babikele amapholisa aseduzane labo.
