uMthunywa
Thokozile Mbedzi
Kubotshwe amasela amathathu akoBulawayo abesehluphile elokitshini leNketa ngokutshontsha kusukela ngenyanga ephelileyo.
Kubikwa Sunboy Moyo oleminyaka engu- 27, Mxolisi Ncube okungasatholakalanga iminyaka yakhe bonke bahlala ePumula South loJohn Mhlanga oleminyaka engu-28 owelokitshini leMbundane babotshelwe amacala okutshontsha kusukela mhlaka 22 ngenyanga ephelileyo kusiyafika kumhlaka 1 kuyonale inyanga.
Isikhulumi samapholisa akoBulawayo, uInspector Abedinico Ncube uthe babophe amadoda amathathu abesehluphile ngamacala okutshontsha koBulawayo.
“Sibophe amadoda amathathu ngemva kokuncwetshwa indlebe nguzulu. Abetheswa amacala laba baqala ukutshontsha kusukela mhlaka 22 ngenyanga ephelileyo baze babotshwa mhlaka 1 kuyonale inyanga.
“Abathathu laba babotshelwe amacala amabili. Siqale ngokubopha oyedwa yena oveze abanye bakhe njalo waveza ukuthi mhlaka 22 bahlangana lomamangala duzane leNketa High ethwele isikhwama bona belamabhemba lengqamu bamthathela umakhalekhukhwini leUS$180.
Uthe abathathu laba baphinda njalo batshontshela omunye undoda iHP laptop, lomakhalekhukhwini duzane lebhawa yekhansili eNketa 8 konke abakuntshontshela undoda lo kubiza $53 200
Uphethe ngokuxwayisa uzulu ukuthi angabohamba endaweni ezicatshileyo njalo ezileganga ikakhulu ebusuku ngoba bengawelwa zingozi.
“Sibonga uzulu ngokuphathisana lamapholisa ukuze oguluva laba babotshwe,” kuphetha ulnsp Ncube.
