Nkosilathi Sibanda
KULINDELEKE ukuthi libe semlonyeni wabantu ibizo likaWalter Musona nxa sekumenyezelwa abadlali abazathola izicoco kumkhosi wePremier Soccer League (PSL) ngoLwesihlanu.
Umdlali weFC Platinum lo kukhangelelwe ukuthi abizwe kubadlali abathathu abedlule bonke kulisizini. Ngokudlala kwakhe, uzathola isicoco saphezulu ese-Soccer Star of the Year.
UWalter Musona
Umdlali wazibeka emehlweni abathandi bebhola likanobhhutshuzwayo kuligi yeCastle Lager ngesikhathi egaxa ibhola emambuleni ka-14 kulisizini.
Ngenxa kaMusona, iFC Platinum ibethwe intshantshau yeligi, yenza imbali ngokuphakamisa inkezo le kane, iminyaka ilandelana.
Omunye ozavela kuleli iqembu ozaphuma ejabula ngoLwesihlanu ntambama ngumqeqetshi uNorman Mapeza. Lapha akuthandabuzwa ngoba nangu umqeqetshi oziqalisele indima yakhe kakuhle, wayicenta, wayiqeda ngendlela elethe impumela enhle ekupheleni komkhankaso womdlalo.
Iligi yeCastle Lager
UMapeza usethwale inkezo yeligi yeCastle Lager okwamahlandla amahlanu engumqeqetshi. Okwakuqala wayithwala leqembu leMonomotapa, waseqhubeka ephumelela leFC Platinum.
I-FC Platinum ilabadlali abathathu abakukhalenda yengcitshi zabadlali balonyaka. Ngaphandle kukaMusona, kuloWallace Magalane ongunozinti. UMagalane wenelisa ukuvimba kakuhle, engahlohlwa kumidlalo engu-16. Omunye nguGift Bello.
Ezinye izococo ezizakwethulwa kumkhosi wePSL zibalisa lo ohlohle ukwedlula bonke. Lesi yisicoco esiya kumgadli weCaps United uWilliam Manondo owahlohla amabhola angu-15.
UWilliam Manondo
Amanye amabizo azamenyezelwa, yilawo akusicoco sohlohle amabhola amanengi, umdlali osemncinyane owenze kahle, unompembe, lomqeqetshi.
Amabizo abadlali abenze kuhle kuCastle Lager:
Walter Musona, Wallace Magalane, Gift Bello (FC Platinum), William Manondo (Caps United), Nelson Chadya, Delic Murimba (Ngezi Platinum), Devine Mhindirira (Highlanders), Brian Muza (Chicken Inn), Tino Benza (Herentals), Eli Kiyana Ilunga (Black Rhinos), Frank Mukarati (Dynamos)