uMthunywa
Thokozile Mbedzi
ZILOKHU zinkemile izakhamizi zeChapfuche eBeitbridge ngemva kokubhacwa kwelinye inina lendoda komunye umuzi okubikwa ukuba bebetshontshe imbuzi ezingu-150 ngoMvulo ekuseni.
Amasela la, uSarah Chauke loCharles Ndou babanjwe xhaka belenkakhayi zembuzi eziyisificamunwe munye, ezingu-81 eziphilayo komunye umuzi.
Kubikwa ezingu-60 kazikabonakali ukuthi bazifihle ngaphi.
Intatheli kaMthunywa ixhumane loMnumzana Malindi Moyo oyisakhamuzi kule indawo oveze ukudana ngesenzo samasela la.
“Sethukile njengezakhamizi ukuthi kulowesifazana laye obephatheka ekutshontshweni kwembuzi zezakhamizi isikhathi sonke lesi.
“Umama lo kukhanya ubebambisana lowesilisa lo njalo besebetshontshe imbuzi ezingu-150. Imbuzi lezi kukhanya bazinqande emadlelweni. Besiyabanjwa kutholakale kulenkakhayi zembuzi eziyisificamunwe munye, lezingu-81 ebezisaphila emzini wabo.
“Kambe loba abantu betshontsha bebengaze baqhube imbuzi ezingu-150 ngasikhathi sinye. Siyabesaba laba bobabili kambe kuyahlaleka sibili labo esigabeni besenzenje,” kuchaza uMnu Moyo.
“UNdou uhle wabotshwa khonapho kodwa uSarah lokhe esadingwa ngamapholisa ngoba wenelisa ukubaleka,” kulandisa uMnu Moyo.
Isikhulumi samapholisa esabelweni seMatabeleland South uInspector uLoveness Mangena ebuzwa ngodaba lolu uvumile wathi solufikile ehofisini yabo.
“Udaba lwenina lendoda abatshontshe imbuzi solufikile ehofisini yethu njalo sikhuthaza uzulu ukuthi eluse izifuyo bengekeli zihamba zodwa zingela muntu.
“Le yiyo kuphela indlela engenza ukuthi abantu bangatshontshelwa izifuyo zabo egangeni. Sicela uzulu ukuba aphathise amapholisa ukuze kubotshwe uChauke,” kuphetha uInsp Mangena.
