uMthunywa
Nkosilathi Sibanda
BABIKA ukuba bahlome baphelele abadlali bamaWarriors abazadibana lesizwe se-Egypt ngoLwesihlanu kumdlalo wokuvula umqhudelwano we-Total Africa Cup of Nations.
Umdlalo lo uzabe esenkundleni ye-International Stadium ngesikhathi sehola lika-10pm.
Kulumdlalo kubatshazwa uMohamed Salah umgadli wodumo weGipite.
Imvimbi zakuleli ezikhulume lephephandaba likazulu zibike ukuba azethuki lutho ngomdlali lo.
Kodwa abaqeqetshi kuzwa kuleli bathi akula lutho lokwesaba kubadlali beEgypt.
UJoey Antipas oweChicken Inn uthe iqembu leGipite lingabe lilentshantshu zabadlali kodwa iZimbabwe ilakho ukuba ncitsha ithuba.
“Ukuphuma kulumdlalo siyibambe kwaba ngutshiki lobhanqa kuyabe kuyimpumela engcono. Yebo iGipite ilabadlali abalamabizo aphezulu kodwa akutsho lutho emncintiswaneni lokho. Abadlale bekhululekile amaWarriors,” kutsho uAntipas.
Umqeqetshi weTalen Vision uMkhuphali Masuku ubike ukuba nxa amaWarriors engakhuza uvalo, engayangisa iGipite ekhaya layo.
“Okubalulekileyo yikuzethemba kubadlali. Inkundla ze-Afcon zinkulu sibili okokuthi umdlali kumele azibambe, azethembe ukuthi engenza konke okusemandleni akhe ukuphathisa iqembu ukuthi linqobe.”
Umdlali wodumo kumaWarriors adla ubhedu uAgent Sawu uthe eyakhe imali ikumaWarriors.
“Sizanqoba kuphela. Akula eyinye ithimu engiyisekelayo ngaphandle kweyakithi.”
UTeenage Hadebe uthe bayazi ukuthi lo kuzabe kungumdlalo obalulekileyo.
“Sihlose ukuthi sinqobe njengamaqembu wonke akhona kulindawo. Asikhethi ukuthi sidlala lobani ngoba sidlala umdlalo ofanayo njalo silwela into eyodwa,” kutsho lumdlali.
Kusenjalo labaqeqetshi beGipite batshaywa luvalo bengazi ukuthi kuyini okuphethwe yiZimbabwe.
Kubikwa kunyanga ezimbili ezedluleyo isizwe seGipite besididizela sicupha imbiko ngamalungiselelo amaWarriors. Umsekeli kamqeqetshi wamaGipite uHany Ramzy nguye obukele phose imidlalo yonke edlalwe yiZimbabwe ilungiselela iAfcon.
Nansi ithimu yamaWarriors ezaqala ukudlala mhlaka 21 Nhlangula:
Onozinti: George Chigova, Edmore Sibanda, Elvis Chipezeze
Imvimbi: Tendayi Darikwa, Jimmy Dzingai, Divine Lunga, Teenage Hadebe, Alec Mudimu, Ronald Pfumbidzayi
Abaphakathi: Marshall Munetsi, Marvelous Nakamba, Danny Phiri, Ovidy Karuru, Kudakwashe Mahachi, Talent Chawapihwa, Khama Billiat, Knowledge Musona, Tafadza Kutinyu, Thabani Kamusoko,
Abagadli: Nyasha Mushekwi, Tino Kadewere, Evans Rusike, Knox Mutizwa
Abadlali
be-Egypt:
Onozinti: Ahmed El-Shennawy, Mohamed El-Shennawy, Mahmoud Gennesh.
Imvimbi: Ahmed Elmohamady, Baher El-Mohamady, Ahmed Hegazi, Mahmoud Alaa, Mahmoud Hamdy El-Wensh, Ahmed Ayman Mansour, Omar Gaber, Ayman Ashraf.
Phakathi: Tarek Hamed, Mohamed Elneny, Ali Ghazal, Nabil Emad Dunga, Abdallah El-Said, Walid Soliman, Mohamed Salah, Mahmoud Hassan Trezeguet, Amr Warda.
Abagadli: Ahmed Ali, Marwan Mohsen, Ahmed Hassan Kouka.
