YiNtatheli kaMthunywa
UMSEKELI kamqeqetshi wamaWarriors, uTakesure Chiragwi, usesole imibono yalabo abathi iZimbabwe yehluleka ukudlala kuhle kumidlalo ye2025 African Nations Championship (Chan) qualifiers.
IZimbabwe yakhetha iqula labadlali abasacathula, inengi labo lileminyaka engaphansi kwe-23, okuliqembu elasuka lanqotshwa 4-0 liqembu leSwatini.
UChiragwi ukwalile ukuthi abadlali bakhe bawudelela lumdlalo, ebika ukuba iqembu leli lisabunjwa ngakho lidinga ukubekezelelwa.
“Angikuzwisisi nxa besithi iZimbabwe kayizange iwuthathele phezulu umdlalo lo,” kutsho uChiragwi. “Sakha iqembu. Lapha sinikeza abadlali abasakhulayo ithuba lokuzibonakalisa.”
Uncome indlela abafana bakhe abazitshengisele ngayo ngesikhathi bedlala leSwatini.
“Sithabile ngokudlala kwabafana bethu. Ukumelana leqembu leSwatini ebeliqinile kungumsebenzi omkhulu. Batshengise ukuqina njalo lokho kuza benza bakhule emdlalweni.”
IZimbabwe iphendukiswe ngemva kokukhutha amahlandla amabili adluleyo ngenxa yokugaxwa izijeziso yinhlanganiso yeFifa. AmaWarriors adlale kuhle kulumqhudelwano ngomnyaka ka-2014 lapho afinyelele khona ihlandla lama semi-finals.
ESwatini izadibana leMadagascar ngoMpalakazi, kumdlalo wokucina kuma-qualifiers.
Umqhudelwano weChan 2025 uzasekelwa ngemali yi-TotalEnergies, njalo kuhlelwe ukuthi uqhutshwe ngoMbimbitho.
KumaWarriors, amehlo azathi nhlo ekulolongeni iqembu elizadlala leKenya kumdlalo kaGroup J mhlaka 15 Lwezi, enkundleni yePeter Mokaba Stadium ePolokwane, South Africa.
Umdlalo uqala ngehola lesithupha ntambama.
Umqeqetshi weZimbabwe, uMichael Nees uchaze kabanzi ngokukhetha kwabo ukuthi badlalele ePolokwane, endaweni yokuthi badlale beseGoli. Ubalise ukuthi iPeter Mokaba kulempahla lenkundla zokulolonga eziseduzane.
IZimbabwe ifuna ukuthi ithole umklomelo owodwa ukuze iqhubekele phambili nanko ihlezi kunombolo yesibili kuGroup J ilemiklomelo eyisitshiya galombili, ilandelwa yiCameroon. IKenya ngeyesithathu lemiklomelo emine. INamibia esemsileni iphethe iqanda.
